پوری دنیا میں 41 لاکھ سے زیادہ کورونا متاثرین

کورونا سے ہلاک ہونے والوں کی تعداد میں مستقل اضافہ جاری ہےاور پوری دنیا میں آخری اعداد و شمار ملنے تک 2 لاکھ 80 ہزار افراد اس وبا سے جاں بحق ہو چکے ہیں جبکہ کورونا متاثرین کی تعداد 41 لاکھ سے تجاوز کر گئی ہے۔

امریکہ میں متاثرین کی تعداد 13 لاکھ سے زیادہ ہو گئی ہے اور وہاں اموات کی تعداد 80 ہزار سے زیادہ ہے۔ امریکہ میں اس مسئلہ کو لے کر صدر ڈونالڈ ٹرمپ کے خلاف ناراضگی بڑھ رہی ہے اور ان کے بیانات پارٹی اور ان کے خود کے لئے مسئلہ بن رہے ہیں۔

یوروپ کے ملک برطانیہ میں کورونا سے ہونے والی اموات میں لگاتار اضافہ ہو رہا ہے اور وہاں یہ تعداد 31 ہزار سے زیادہ ہو گئی ہے ۔ اٹلی میں ہلاکتوں کی تعداد میں کمی واقع ہوئی ہے اور وہاں ابھی اس وبا سے ہلاک ہونے والوں کی تعداد 30 ہزار سے زیادہ ہے ۔ اسپین اور فرانس میں یہ تعداد 26 ہزار سے زیادہ ہے۔

روس میں کل دس ہزار نئے معاملوں کے رپورٹ ہونے کے بعد وہاں متاثرین کی تعداد 1 لاکھ 98 ہزار سے زیادہ ہے لیکن وہاں مرنے والوں کی تعداد 1800 سے تھوڑی زیادہ ہے۔ سعودی عرب میں کورونا متاثرین کی تعداد 37 ہزار سے زیادہ ہو گئی ہے اور وہاں اموات کی تعداد 239 ہے۔ پاکستان میں متاثرین کی تعداد 28 ہزار سے زیادہ ہے اور وہاں ہلاک ہونے والوں کی تعداد 636 ہے۔ اسرائیل میں متاثرین کی تعداد 16 ہزار سے زیادہ ہے اور ہلاک ہونے والوں کی تعداد 247 ہے۔