روس میں کورونا متاثرین کی تعداد میں اضافہ جاری ، متاثرین 2 لاکھ 9 ہزار سے زیادہ

روس میں کورونا متاثرین کے معاملوں میں مستقل اضافہ ہو رہا ہے اور وہاں اب تک 2 لاکھ 9 ہزار سے زیادہ افراد کورانا سے متاثر ہو چکے ہیں لیکن وہاں کورونا سے ہلاک ہونے والوں کی تعداد زیادہ نہیں ہے۔ روس میں تازہ اعداد و شمار ملنےتک کورونا سے 1915 افراد ہلاک ہوئے ہیں۔

ادھر پوری دنیا میں کورونا سے ہلاک ہونے والوں کی تعداد میں مستقل اضافہ جاری ہےاور پوری دنیا میں آخری اعداد و شمار ملنے تک 2 لاکھ 83 ہزار افراد اس وبا سے جاں بحق ہو چکے ہیں جبکہ کورونا متاثرین کی تعدادساڑے 41 لاکھ سے تجاوز کر گئی ہے۔

امریکہ میں متاثرین کی تعدادساڑے 13 لاکھ سے زیادہ ہو گئی ہے اور وہاں اموات کی تعدادساڑے 80 ہزار سے زیادہ ہو گئی ہے۔امریکہ میں سابق صدر براکاوبامہ نے کورونا کے انتظام کو لے کر ٹرمپ انتظامیہ کی شدید تنقید کی ہے۔ انہوں نے کہا ہے کہ نظام انتشار سے بھر پور ہے۔

برطانیہ میں کورونا سے ہونے والی اموات میں لگاتار اضافہ ہو رہا ہے اور وہاں یہ تعداد 31 ہزار سے زیادہ ہو گئی ہے ۔ اٹلی میں اس وبا سے ہلاک ہونے والوں کی تعداد 30 ہزار سے زیادہ ہے ۔ اسپین اور فرانس میں یہ تعداد 26 ہزار سے زیادہ ہے۔

سعودی عرب میں کورونا متاثرین کی تعداد 39 ہزار سے زیادہ ہو گئی ہے اور وہاں اموات کی تعداد 246 ہے۔ پاکستان میں متاثرین کی تعداد ۳۰ ہزار سے زیادہ ہے اور وہاں ہلاک ہونے والوں کی تعداد 259 ہے۔ اسرائیل میں متاثرین کی تعداد 16 ہزار سے زیادہ ہے اور ہلاک ہونے والوں کی تعداد 252 ہے۔