روس: حادثہ کا شکار طیارے کے دونوں پائلٹوں کا کوئی سراغ نہیں

ماسکو: روسی وزارت دفاع کے حادثہ کا شکار ایس یو- 25 یوبی طیارہ کے دونوں پائلٹوں کا ابھی تک کوئی سرغ نہیں مل پایا ہے۔ خدشہ ہے کہ حادثے میں ان کی موت ہو گئی ہے اور ان کی لاشیں ہوائی جہاز کے کیبن میں ہی ہوں گی۔ وزارت دفاع نے گزشتہ روز بتایا تھا کہ جہاز روس کے جنوبی علاقے استاؤروپول میں ایک تربیتی پرواز کے دوران گر کر تباہ ہو گیا تھا۔ جہاز ایک ویران علاقے میں گر کر تباہ ہوا اور اس دوران اس کے زمین سے ٹکرانے کے بعد اس میں شدید دھماکہ ہوا جس سے جہاز کے پڑخچے اڑ گئے۔

علاقائی ایمرجنسی سروس کے ایک نمائندے نے بدھ کو بتایا کہ ایس یو -25 یوبی طیارے کے پائلٹوں کا کچھ پتہ نہیں چل پایا ہے۔ خدشہ ہے کہ حادثہ میں دونوں پائلٹوں کی موت ہو گئی ہے اور ان کی لاشیں ہوائی جہاز کے کیبن میں ہی ہوں گی۔ انہوں نے بتایا کہ حادثہ کا شکار طیارہ زمین میں نصف دھنس گیا تھا۔ اسپیشل کمیشن کے عملہ کے پہنچنے پر جلد سے جلد اس سے باہر نکالنے کا کام شروع کیا جائے گا۔

تازہ اطلاعات کے مطابق طیارہ چرنولیسکو نامی مقام سے 20 کلومیٹر کے فاصلہ پر حادثہ کا شکار ہوا اور کم از کم 44 افراد اور 14 ساز و سامان کی یونٹیں جائے حادثہ پر متحرک ہیں۔