امریکی ’سیریل کلر‘ کا اعتراف جُرم، 35 سال میں 93 خواتین کا کیا قتل

ایف بی آئی کا تفتیش کے بعد یہ کہنا ہے کہ ابھی تک سیمول لٹل کے 50 افراد کے قتل کرنے کی تصدیق ہوئی ہے، لیکن تفتیش کاروں کا ماننا ہے کہ قاتل کے تمام93 اعترافات درست ہیں۔

تصویر سوشل میڈیا
تصویر سوشل میڈیا

یو این آئی

نیویارک: ریاستہائے متحدہ امریکہ کی تاریخ کے سب سے خطرناک قاتل سیمول لٹل نے اعتراف کیا ہے کہ اس نے 35 سال میں 93 خواتین کا قتل کیا ہے۔غیر ملکی میڈیا رپورٹس کے مطابق امریکی تفتیشی ایجنسی ایف بی آئی کی جانب سے ایک 79 سالہ امریکی سیریل کلر’سیمول لٹل‘ کے اعترافات سامنے آئے ہیں جس نے سال 1970 سے 2005 تک93 خواتین کا قتل کیا ہے اور قتل کرنے کے بعد ان کے خاکے بھی بنائے ہیں۔

ایف بی آئی کے تفتیشی اہلکاروں کا کہنا ہے سیمول لٹل کی جانب سے جاری کیے گئے خاکوں کی مدد سے مقتولین کی شناخت کی جائے گی، تاہم ان میں سے کچھ کی شناخت ہوگئی ہے۔ایف بی آئی کا تفتیش کے بعد یہ کہنا ہے کہ ابھی تک سیمول لٹل کے 50 افراد کے قتل کرنے کی تصدیق ہوئی ہے، لیکن تفتیش کاروں کا ماننا ہے کہ قاتل کے تمام93 اعترافات درست ہیں۔

ایف بی آئی نے ایک ویب سائٹ بنائی ہےجہاں انہوں نے وہ تمام خاکے جاری کیے ہیں جو سیریل کلر سیمول لٹل نے خود بنائے ہیں، یہ خاکے ان تمام خواتین کے ہیں جنہیں اس نے قتل کیا تھا۔ایف بی آئی کے جرائم کی تجزیہ کار کرسٹی پلازولو کا کہنا ہے کہ ’’ کئی برسوں تک سیمول لٹل کا ماننا تھا کہ اسے پکڑا نہیں جائے گا کیونکہ کسی نے اس کے خلاف مقدمہ درج نہیں کرایا تھا۔‘‘

اس کے علاوہ زیادہ تر ہلاکتوں کے بارے میں کہا جا رہا تھا کہ وہ حادثاتی طور پر ہوئیں ہیں یا ان کی وجہ معلوم نہ ہوسکی جبکہ کچھ لاشیں کبھی ملی ہی نہیں ہیں۔2014 میں سیمول لٹل کو تین خواتین کے قتل کے جرم میں عمر قید کی سزا ہوگئی تھی۔کرسٹی پلازولو نے کہا کہ سیمول لٹل ابھی صرف تین خواتین کے قتل کے جرم میں جیل میں ہے لیکن ایف بی آئی کا ماننا ہے کہ ہر مقتول کے لئے انصاف ضروری ہے تاکہ کیس بند ہو سکے۔

ماضی میں باکسر رہنے والے سیمول لٹل جنہیں ’سیمول مکڈوول‘ کے نام سے بھی جانا جاتا ہے، کو پہلی بار 2012 میں گرفتار کیا گیا تھا۔ اس وقت وہ امریکی ریاست کنٹکی میں بے گھر افراد کے لئے بنی ایک پناہ گاہ میں رہتے تھے۔ وہ پہلی مرتبہ منشیات کے الزام میں گرفتار ہوئے اور کیلیفورنیا بھیج دیئے گئے۔

کیلیفورنیا میں ڈی این اے ٹسٹ کے بعد مزید تین کیسز سامنے آئےجس کے بعد انہیں 1987 سے 1989 کے درمیان کیلیفورنیا کے شہر لاس اینجلس میں تین عورتوں کے قتل کے جرم میں سزا سنائی گئی۔سیمول لٹل نے تینوں خواتین کو تشدد کے بعد ان کا گلا گھونٹ کر موت کے گھاٹ اتاردیاتھا۔

Published: 8 Oct 2019, 5:07 PM