ایران سے حالیہ جنگ کے بعد امریکہ کا اسرائیل کو 51 کروڑ ڈالر کے ہتھیار دینے کا اعلان

واشنگٹن: ایران کے ساتھ حالیہ فضائی تنازعے کے بعد امریکہ نے اسرائیل کو 510 ملین (51 کروڑ) ڈالر کے ہتھیار فراہم کرنے کی منظوری دے دی ہے۔ امریکی محکمہ خارجہ نے 30 جون 2025 کو اعلان کیا کہ وہ اسرائیل کو جدید بم گائیڈنس کٹس اور دیگر فوجی سازوسامان فراہم کرے گا۔

امریکی ڈیفنس سکیورٹی کوآپریشن ایجنسی (ڈی ایس سی اے) کی جانب سے جاری بیان میں کہا گیا ہے کہ یہ ہتھیار اسرائیل کو اپنی سرحدوں، اہم بنیادی ڈھانچے اور گنجان آباد علاقوں کی حفاظت کے قابل بنائیں گے۔ بیان میں مزید کہا گیا کہ اسرائیل کی سلامتی امریکی قومی مفادات کے لیے بھی اہم ہے اور امریکہ اسرائیل کو مضبوط اور خودمختار دفاعی صلاحیت فراہم کرنے کے لیے پرعزم ہے۔

اس معاہدے کی حتمی منظوری امریکی کانگریس سے درکار ہے، جس کے لیے ڈی ایس سی اے نے باضابطہ نوٹیفکیشن جاری کر دیا ہے۔ اگر کانگریس کی منظوری مل جاتی ہے تو ہتھیاروں کی فراہمی جلد شروع ہو جائے گی۔

واضح رہے کہ اسرائیل نے 13 جون کو ایران کی جوہری تنصیبات، سائنسدانوں اور اعلیٰ فوجی افسران کو نشانہ بناتے ہوئے ایک وسیع فضائی مہم کا آغاز کیا تھا۔ اسرائیلی دعویٰ ہے کہ اس مہم کا مقصد ایران کے جوہری پروگرام کو ختم کرنا تھا۔ جبکہ ایران کا مؤقف ہے کہ اس کا جوہری پروگرام مکمل طور پر شہری مقاصد کے لیے ہے۔

ادھر امریکہ اور دیگر عالمی طاقتیں ایران کے جوہری پروگرام پر شکوک کا اظہار کر چکی ہیں۔ امریکی صدر ڈونالڈ ٹرمپ نے 2018 میں ایران کے ساتھ ہونے والے جوہری معاہدے سے علیحدگی اختیار کر لی تھی اور اب حالیہ کشیدگی کے دوران انہوں نے ایران کی جوہری تنصیبات پر براہ راست فوجی حملوں کا حکم دیا۔

گزشتہ ہفتے جنگ بندی کے بعد حالات وقتی طور پر پر سکون ہو گئے تھے، مگر اسرائیلی وزیر اعظم بنجامن نیتن یاہو نے واضح الفاظ میں کہا ہے کہ اسرائیل، ایران کو اپنے جوہری پروگرام کی بحالی کی اجازت نہیں دے گا۔ ان کے اس اعلان سے اندازہ لگایا جا رہا ہے کہ خطے میں ایک اور بڑی جنگ کا امکان اب بھی باقی ہے۔