امریکہ میں حادثہ: لینڈنگ کے دوران یو ایس ایئر لائنس کا طیارہ ہیلی کاپٹر سے ٹکرایا، کئی اموات کا خدشہ

امریکہ میں ایک بڑا طیارہ حادثہ ہوا ہے۔ نیوز ایجنسی رائٹرس کی رپورٹ کے مطابق امریکی ایئر لائنس کی فلائٹ 5342 بدھ کو واشنگٹن ڈی سی کے رونالڈ ریگن نیشنل ایئر پورٹ کے پاس ایک بلیک ہاک ہیلی کاپٹر سے لینڈنگ کے وقت ٹکرا گئی۔ اس حادثہ کے بعد ایئر پورٹ سے سبھی پروازیں منسوخ کر دی گئیں۔ رونالڈ ریگن نیشنل ایئر پورٹ نے بدھ کی دیر رات بیان جاری کرکے اس واقعہ کی تصدیق کی ہے۔ میڈیا رپورٹ کے مطابق رات تقریباً 9 بجے یہ ٹکر ہوئی ہے۔ اس وقت جیٹ طیارہ وچیٹا کنساس سے اڑا تھا۔ ہوائی اڈے کے رنوے کے پاس پہنچتے وقت فوج کے بلیک ہاک ہیک ہیلی کاپٹر سے ٹکرا گیا۔

طیارہ حادثہ کی اطلاع ملتے ہی ہنگامی اہلکار موقع پر پہنچ کر حالات کو قابو میں کرنے کی کوشش میں لگ گئے۔ واشنگٹن ڈی سی فائر ڈپارٹمنٹ نے الگ سے اس معاملے کی تصدیق کی ہے۔ وہیں وہائٹ ہاؤس ترجمان کے مطابق امریکی صدر ڈونالڈ ٹرمپ کو حالات سے باخبر کرا دیا گیا ہے۔ امریکی ایئر لائنس ویب سائٹ کے مطابق حادثہ کے شکار جیٹ میں 65 مسافروں کے بیٹھنے کی صلاحیت ہے۔ امریکی نائب صدر جے ڈی وینس نے اس واقعہ کو لے کر 'ایکس' پر پوسٹ کیا ہے۔ انہوں نے کہا کہ ہم حالات پر نظر رکھے ہوئے ہیں فی الحال بہتری کی امید کرتے ہیں۔

امریکی سینیٹر ٹیڈ کروز نے کہا ہے کہ اس واقعہ میں کئی لوگوں کی موت ہوئی ہے۔ انہوں نے اپنے پوسٹ میں کہا، "حالانکہ ابھی تک نہیں پتہ کہ طیارہ میں سوار کتنے لوگ مارے گئے ہیں لیکن ہمیں پتہ ہے کہ کچھ لوگوں کی موت ہوئی ہے۔"

سوشل میڈیا پر جاری ویڈیو میں دیکھا جا سکتا ہے کہ کیسے طیارہ نے ریگن ایئر پورٹ سے لینڈنگ کے دوران ہیلی کاپٹر کو ٹکر ماری۔ ٹکر کے بعد طیارہ آگ کے گولہ میں تبدیل ہو جاتا ہے اور آسمان میں چنگاری پھوٹ پڑتی ہے۔