ایشیاء کپ ہاکی: ہندوستان نے پاکستان کو 3-1 سے شکست دی

ڈھاکہ: ہندوستان اورپاکستان کے درمیان ایشیاء کپ کے سلسلہ میں کھیلے گئے آخری پول میچ میں ہندوستان کی ٹیم نے پاکستان کو 3-1 سے شکست دے کر کامیابی حاصل کر لی۔ چند ہفتے قبل ہی انگلینڈ میں کھیلے گئے ورلڈ کپ کوالیفائینگ راؤنڈ میں ہندوستان کے ہاتھوں سات اور چھ گولزکے بڑے فرق سے شکست کھانے والی پاکستا ن کی ٹیم حالانکہ اس میچ میں ہندوستان کے خلاف انتہائی پریشر کے باوجود کچھ بہتر کھیل پیش کرتی ہوئی نظر آئی لیکن وہ جیت کے لئے کافی نہ تھا۔

کھیل کے پہلے ہاف کے دونوں کو اٹرمیں دونوں ٹیم کے درمیان زبردست مقابلہ دیکھنے کو ملا، پاکستان نے پہلے ہاف میں کم از کم دو مواقع مس کئے ۔ تاہم کھیل کے 17 ویں منٹ میں ہندوستان کی جانب سے آکاش دیپ کے پاس پر چینگلنگ سانا نے فیلڈ گول اسکور کرتے ہوئے، ہندوستان کی ٹیم کو پاکستان پر 1-0سے بر تری دلا دی جو ہاف ٹائم تک بر قرار رہی۔

کھیل کے دوسرے ہاف کے تیسرے کواٹر میں ہندوستان کی ٹیم نے پاکستان کے خلاف اٹیکینگ حکمت عملی اپناتے ہوئے پاکستان کی گول پوسٹ پر تابڑ توڑ حملے شروع کر دئیے اور تیسرے کو اٹر میں اس کی جانب سے کھیل کے 44 ویں منٹ میں رمن دیپ سنگھ نے فیلڈ گول کر کے ہندوستان کو پاکستان کے خلاف بر تری 2-0 تک پہنچا دی جبکہ تیسرے ہاف کے 45 ویں منٹ میں ہرمن پریت نے پنلٹی کارنر پر گول اسکور کرتے ہوئے بھارت کی برتری 3-0 تک پہنچا دی۔

میچ کے دوران واحد گول پاکستان کی جانب سے علی شان نے کھیل کے 49 ویں منٹ میں کیا۔ اس اہم میچ میں پاکستان کو چار پنلٹی کارنرز ملے تاہم پاکستان کی ٹیم ان میں سے کسی بھی پنلٹی کارنر پر گول نہ کر سکی۔ یوں ہندوستان نے پاکستان کو اس مقابلے میں 3-1سے شکست دے کر کامیابی اپنے نام کر لی۔