دہلی میں کورونا کے 325 نئے معاملے

قومی دارالحکومت دہلی میں جمعرات کو یعنی کل کورونا وائرس (کووڈ -19) وبا کے 325 نئے معاملے سامنے آئے ہیں۔

دہلی حکومت کی طرف سے آج جاری ہیلتھ بلیٹن کے مطابق گزشتہ 24 گھنٹوں کے دوران 325 نئے معاملے سامنے آنے کے ساتھ ہی دارالحکومت میں متاثرین کی تعداد بڑھ کر 18,67,206 ہو گئی ہے۔ اس سے قبل بدھ کو 299 نئے معاملے رپورٹ ہوئے تھے۔

دہلی میں گزشتہ دو ماہ سے کورونا کے معاملات میں مسلسل کمی کے بعد پچھلے کچھ دنوں سے نئے معاملوں میں اضافہ ہو رہا ہے۔ دہلی میں گزشتہ 24 گھنٹوں کے دوران اس بیماری سے کوئی موت نہیں ہوئی ہے۔ ریاست میں روزانہ انفیکشن کی شرح 2.39 تک پہنچ گئی ہے۔ریاستی حکومت صورتحال پر نظر رکھے ہوئے ہے۔

دہلی کے وزیر صحت ستیندر جین نے اس سے قبل کہا تھا کہ جب تک کوئی نیا ویریئنٹ سامنے نہیں آتا پریشان ہونے کی کوئی بات نہیں ہے۔انہوں نے کہاکہ "دہلی میں روزانہ 100-200 کے درمیان معاملے درج ہو رہے ہیں۔ ہم اسپتال میں داخل مریضوں پر نظر رکھے ہوئے ہیں۔‘‘

دہلی کے نائب وزیر اعلی منیش سسودیا نے کہا ہےکہ قومی دارالحکومت میں کورونا کے معاملات میں اضافہ ہوا ہے لیکن فی الحال تشویش کی کوئی بات نہیں ہے۔ سسودیا نے جمعرات کو یہاں کہا کہ کورونا کے معاملات میں اضافہ ہوا ہے لیکن پریشان ہونے کی کوئی بات نہیں ہے کیونکہ لوگوں کو اسپتال میں داخل ہونے کی ضرورت نہیں ہے۔ انہوں نے کہا کہ ابھی تک اس بات کا پتہ نہیں چل سکا ہے کہ یہ پرانا ویریئنٹ ہے یا نیا۔ یہ جینوم سیکوینسنگ سے پتہ چلےگا۔ اگر کسی اسکول میں ایک بھی کیس ہے تو ہم اس پر نظر رکھتے ہیں۔