تربیت سے لوٹنے والے بارہ پولیس اہلکار کورونا سے متاثر پائے گئے

کورونا وبا کے معاملات میں کمی کا رجحان صاف نظر آ رہا ہے ۔ ملک کی راجدھانی دہلی میں کئی روز سے اس وبا کی وجہ سے کسی کے مرنے کی کوئی خبر نہیں آ ئی ہے ،لیکن مہاراشٹر سے ایک تشویش بھری خبر موصول ہوئی ہے۔ مہاراشٹر کے پونے میں واقع ریاستی انٹیلی جنس اکیڈمی سے اپنے تربیتی سیشن سے واپس آنے والے 12 پولیس اہلکار اتوار کو کورونا وائرس انفیکشن سے متاثر پائے گئے ہیں۔ یہ اطلاع ایک سینئر پولیس افسر نے دی ہے۔

عہدیدار نے بتایا کہ ناگپور پولیس کے کل 33 اہلکار چند ہفتے پہلے ٹریننگ کے لیے پونے گئے تھے اور وہاں سے واپس آنے کے بعد دو پولیس اہلکاروں میں کورونا کی ہلکی علامات ظاہر ہوئیں جس کے بعد احتیاط کے طور پر ہفتے کی رات ان کے نمونوں کی جانچ کی گئی جو مثبت آئے۔ جس کے بعد تمام 33 پولیس اہلکاروں کے نمونوں کے جانچ کا فیصلہ کیاگیا ہے۔

عہدیدار نے بتایا کہ اس کے علاوہ مزید 10 پولیس اہلکاروں کی رپورٹ مثبت آئی ہے اور ان تمام لوگوں کو ملاکر مجموعی طور سے ایسے 12 پولیس اہلکاروں کی رپورٹ مثبت آئی ہے۔ اس خبر کو لے کر تشویش ہے اور تمام احتیاطی اقدام اٹھائے جا رہے ہیں۔