ایسٹ بنگال پر دلچسپ جیت کے ساتھ موہن بگان نےجیتا ڈورنڈ کپ

موہن بگان سپر جائنٹس نے دمتری پیٹراٹس کے فیصلہ کن گول کی بدولت اتوار کو ایک دلچسپ فائنل میں ایسٹ بنگال ایف سی کو 1-0 سے شکست دے کر 17ویں بار ڈورنڈ کپ کا خطاب جیت لیا۔

سالٹ لیک اسٹیڈیم میں کھیلے گئے ڈربی میں پیٹراٹس نے 71ویں منٹ میں فتح کا گول کیا۔ اس جیت کے ساتھ ہی موہن بگان 17 بار ڈورنڈ کپ کا خطاب جیتنے والی پہلی ٹیم بن گئی۔ ایسٹ بنگال 16 ٹرافیوں کے ساتھ ٹورنامنٹ کی دوسری کامیاب ٹیم ہے۔موہن بگان نے آخری مرتبہ 2000 میں خطاب جیتا تھا۔ ٹیم 2004، 2009 اور 2019 میں بھی فائنل میں پہنچی تھی لیکن ٹرافی نہ اٹھا سکی۔ دو دہائیوں کے بعد ڈیورنڈ کپ چیمپئن بننے کا خواب دیکھنے والی موہن بگان کا پہلے ہاف میں گیند پر زیادہ قبضہ تھا لیکن کلب اپنا کھاتہ نہیں کھول سکا۔

ایسٹ بنگال نے آہستہ آہستہ رفتار پکڑی اور پہلے ہاف کے اختتام پر گول کرنے کے قریب پہنچ گئی۔ محمد رفیق اور بورجا ہیریرا نے ایسٹ بنگال کے لیے ایک موقع بنایا لیکن نند کمار شیکھر ہدف کو درست طریقے سے نشانہ نہیں بنا سکے۔ پہلے ہاف کے اضافی وقت میں موہن بگان کو بھی موقع ملا لیکن دمتری پیٹراٹس کی کوشش ایسٹ بنگال کے گول پوسٹ کے اوپر سے گزر گئی۔

موہن بگان نے پہلے ہاف کا اختتام 0-0 سے کیا، لیکن وقفے سے کچھ دیر قبل اسے تین یلو کارڈز کا سامنا کرنا پڑا۔ موہن بگان کی مشکلات اس وقت بڑھ گئیں جب 62ویں منٹ میں انیرودھ تھاپا کو ریڈ کارڈ دیکھنے کے بعد میدان چھوڑنا پڑا۔

موہن بگان کے لیے محض 10 کھلاڑیوں کے ساتھ کھیلنا مشکل ہو سکتا تھا لیکن تھاپا کی غیر موجودگی میں ٹیم زیادہ خطرناک دکھائی دے رہی تھی۔ نو منٹ کے اندر پیٹراٹس نے باکس کے باہر سے ایک زوردار کک لگا کر گیند کو جال میں بھیج دیا۔ پورے میچ میں یہ موہن بگان کا واحد درست شاٹ تھا، لیکن یہ انہیں فتح دلانے کے لیے کافی تھا۔

ایسٹ بنگال کے پاس گول پر چھ شاٹس تھے لیکن گول پوسٹ کے قریب ان کی فنشنگ کی کمی ان کے لئے مہنگی ثابت ہوئی۔ دوسرے ہاف میں 10 منٹ کا اضافی وقت ملنے کے باوجود ایسٹ بنگال کا کھاتہ نہ کھل سکا اور پورے ٹورنامنٹ میں ناقابل شکست رہنے والی ٹیم فائنل میں ہار گئی۔ ڈورنڈ کپ 2023 کا آغاز 3 اگست سے ہوا تھا۔ ٹورنامنٹ کے 132 ویں ایڈیشن میں 24 ٹیموں نے حصہ لیا جو کہ گزشتہ سال کے مقابلے میں چار زیادہ ہیں۔