اہم خبریں: باراتیوں کی بس حادثے کا شکار، 21 زخمی، ایک کی موت

 تصویر آئی اے این ایس
تصویر آئی اے این ایس
user

قومی آوازبیورو

26 Nov 2020, 6:32 PM

باراتیوں کی بس حادثے کا شکار، 21 زخمی، ایک کی موت

سنبھل: اترپردیش کے ضلع سنبھل کے دھناری علاقے میں نیشنل ہائی وے پر باراتیوں سے بھری ایک بس اور ٹرکٹر ٹرالی کے درمیان ٹکر ہوگئی۔ اس حادثے میں ٹرکٹر ڈرائیور کی موت ہوگئی جبکہ 21 افراد زخمی ہوگئے۔ پولیس ذرائع نے یہاں بتایا کہ دھناری علاقے میں مانکپور کی مڑئیا باشندہ دھنی رام کے بیٹے کلیان کی بارات بدھ شام جناوی گئی تھی۔ نصف شب کے بعد باراتیوں کو لے کر بس واپس آرہی تھی۔ نیشنل ہائی وے پر بس قصبہ دھناری کے پاس سامنے سے آرہے ٹرکٹر۔ ٹرالی سے ٹکرا گئی۔ حادثے میں ٹرکٹر ڈرائیور پاٹھک کپور کے بیٹے پنا لال کی موت ہوگئی جبکہ اس کا ساتھ زخمی ہوگیا۔ انہوں نے بتایا کہ بس میں سوار 20 باراتی زخمی ہوگئے جن میں سے 2 کی حالت نازک بتائی جاتی ہے۔

26 Nov 2020, 1:25 PM

آبائی مقام پر احمد پٹیل کی تدفین، راہل گاندھی نے کی شرکت

کانگریس کے سینئر رہنما احمد پٹیل کی تدفین ان کے آبائی گاؤں بھروچ ضلع کے پیرامن میں انجام دی گئی۔ یہاں موجود حاضرین نے احمد پٹیل کو نم آنکھوں سے خراج عقیدت پیش کیا۔ کانگریس کے سابق صدر راہل گاندھی جمعرات کی صبح احمد پٹیل کو آخری سلام پیش کرنے بھروچ پہنچے۔

خیال رہے کہ احمد پٹیل کا کورونا وائرس سے متاثر ہونے کے بعد گڑگاؤں کے میدانتا میں انتقال ہو گیا تھا۔ وہ یہاں آئی سی یو میں داخل تھے اور ان کے جسم کے اعضا نے کام کرنا بند کر دیا تھا۔

26 Nov 2020, 12:36 PM

وزیر داخلہ امت شاہ نے ممبئی حملے میں شہدا کو یاد کیا

نئی دہلی: مرکزی وزیر داخلہ امت شاہ نے جمعرات کے روز ممبئی دہشت گردانہ حملے کی 12 ویں برسی کے موقع پراس حملہ میں دہشت گردوں سے ڈٹ کر سامنا کرنے والے بہادر سیکیورٹی اہلکاروں کوان کی بہادری اورقربانیوں کو خراج عقیدت پیش کرتے ہوئے کہا کہ ملک ان کی قربانیوں کو ہمیشہ یاد رکھے گا۔

26 نومبر 2008 کو ممبئی کو بم دھماکوں اوراندھا دھند فائرنگ سے دہشت گردوں نے ہلا کر رکھ دیا۔ بارہ سال قبل اس حملے میں ڈیڑھ سو سے زیادہ افراد ہلاک اور 300 سے زیادہ افراد زخمی ہوئے تھے۔

شاہ نے حملے کی 12 ویں برسی کے موقع پر جاں بحق ہونے والوں کو خراج عقیدت پیش کرتے ہوئے کہا ’’میں ممبئی 26/11 کے دہشت گردانہ حملوں میں اپنی جانوں سے ہاتھ دھو بیٹھے تمام افراد کو خراج عقیدت پیش کرتا ہوں اور ان کے اہل خانہ سے اظہار تعزیت کرتا ہوں۔ ان حملوں میں دہشت گردوں کا سامنا کرنے والے بہادر سکورٹی اہلکاروں کو سلام۔ یہ قوم آپ کی بہادری اور قربانیوں کے لئے ہمیشہ شکر گزار رہے گی۔‘‘

26 Nov 2020, 10:55 AM

میراڈونا کے انتقال پر وزیر اعظم مودی کا اظہار تعزیت

وزیراعظم نریندر مودی نے جمعرات کے روز سابق عالمی شہرت یافتہ فٹ بال کھلاڑی ارجنٹائن کے ڈیاگو میراڈونا کے انتقال پر اظہار تعزیت کیا اور کہا کہ ان کی ناگہانی موت سے ہم سب غمزدہ ہیں۔ شہرہ آفاق فٹ بال کھلاڑی ڈیاگو میراڈونا کا بدھ کے روز 60 سال کی عمر میں دل کا دورہ پڑنے سے انتقال ہوگیا۔ کچھ دن پہلے ہی ان کے دماغ میں خون کے تھکے کی سرجری کرائی گئی تھی۔

میراڈونا کی موت پر اظہار تعزیت کرتے ہوئے وزیر اعظم مودی نے ٹویٹ کیا ’’ڈیاگو میراڈونا فٹ بال کے جادوگر تھے جنہوں نے اس کھیل کو دنیا میں مقبولیت کے عروج پر پہنچایا۔ میراڈونا نے اپنی زندگی میں فٹ بال کے میدانوں میں کھیل کے بہترین لمحات سے ہمیں لطف اندوز ہونے کا موقع فراہم کیا ۔ ہم سب ان کی اس ناگہانی موت سے غمزدہ ہیں۔ ایشوران کی آتما کو شانتی دے‘‘۔

26 Nov 2020, 9:30 AM

سوڈان کے سابق وزیر اعظم صادق المہدی کا انتقال

سوڈان کے سابق وزیراعظم صادق المہدی کا 84 سال کی عمر میں انتقال ہوگیا۔ سوڈانی میڈیا کے مطابق نومبر کے اوائل میں ان کی کورونا رپورٹ مثبت آئی تھی۔ جس کے بعد ان کی طبیعت بگڑتی چلی گئی۔ صادق مہدی کا انتقال متحدہ عرب امارات میں ہوا ہے۔ وہ 1966–1967 اور دوبارہ 1986–89 تک سوڈان کے وزیر اعظم رہے۔

26 Nov 2020, 9:45 AM

اسرائیلی وزیر اعظم نیتن یاہو کا دورہ بحرین ملتوی

اسرائیلی وزیر اعظم بنجامن نیتن یاہو کا بحرین کا دورہ ملتوی کردیا گیا ہے اور اب یہ دورہ دسمبر کے وسط میں متوقع ہے۔ ’ہارٹیز‘ کے مطابق نیتن یاہو نے منگل کے روز کہا کہ انہوں نے مستقبل قریب میں ملک کے ولی عہد شہزادہ سلمان بن حماد کی دعوت پر بحرین جانے کا پروگرام ہے۔

اخبار کے مطابق نیتن یاہو اگلے ہفتے بحرین کا دورہ نہیں کریں گے۔ ان کا متحدہ عرب امارات کا دورہ وہاں قومی تعطیل ہونے کی وجہ سے منسوخ کردیا گیا ہے۔ دوسری جانب اسرائیلی وزیر اعظم کے دفتر نے بھی اس بات پر کچھ بھی کہنے سے انکار کردیا ہے۔ خیال رہے متحدہ عرب امارات اور بحرین نے تعلقات کو معمول پر لانے کے لئے 15 ستمبر کو اسرائیل کے ساتھ معاہدہ پر دستخط کئے تھے۔

26 Nov 2020, 6:48 AM

میراڈونا کے انتقال پر ارجنٹائن میں سہ روزہ قومی سوگ کا اعلان

فٹبال کی تاریخ کے سب سے عظیم کھلاڑیوں میں سے ایک ڈیاگو میراڈونا کے انتقال کی خبر ملتے ہی کھیل کی دنیا میں صف ماتم بچھ گئی ہے۔ میراڈونا کا بدھ کے روز گھر میں دل کا دورہ پڑنے سے انتقال ہوا تھا۔ ارجنٹائن کے صدر البرٹو فرنانڈیز نے اپنے ملک کے اس عظیم فٹ بالر کی موت پر سہ روزہ قومی سوگ کا اعلان کر دیا ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔

next