فٹ بال میچ کے سبب لیورپول میں پھیلا کورونا وائرس، جانچ کا مطالبہ

دنیا بھر میں پھیل چکے مہلک کورونا وائرس کی وجہ سے کھیل کی دنیا کی تمام سرگرمیاں بری طرح متاثر ہیں لیکن برطانیہ کے اینفیلڈ اسٹیڈیم میں گزشتہ ماہ اس وائرس سے پھیلے قہر کے درمیان منعقد ہوئی یوروپین چمپئنز لیگ مقابلے کی جانچ کا مطالبہ کیا جارہا ہے ۔

چمپئنز لیگ کا ایٹلیٹکو میڈرڈ اور لیورپول کا یہ مقابلہ دراصل اسپین میں ہونا تھا لیکن اسپین میں کورونا سے مچی تباہی کی وجہ سے عائد لاک ڈاؤن کے سبب اس کا انعقاد برطانیہ میں لیورپول کے اینفیلڈ اسٹیڈیم میں کیا گیا جہاں اسپین سے ایٹلیٹکو میڈرڈ کے تین ہزار سے زیادہ پرستار مقابلہ دیکھنے پہنچے تھے۔

یہ بھی پڑھیں، حکومت کا مہنگائی بھتے میں کمی کا فیصلہ غیر حساس: راہل گاندھی

کورونا وائرس کے قہر کے درمیان اس میچ کے انعقاد سے متعلق لیورپول کی رکن پارلیمنٹ ماریا ایگل نے جانچ کا مطالبہ کیا ہے کیونکہ لیورپول میں کورونا سے موت کے سب سے زیادہ کیسز سامنے آئے ہیں۔ انہوں نے کہا کہ اگرچہ اس دوران برطانیہ میں لاک ڈاؤن کا کوئی اعلان نہیں ہوا تھا لیکن کورونا متاثرہ علاقے سے ہزاروں لوگوں کی لیورپول آنے پر کوئی نظر نہیں رکھی گئی اور پرستار مقابلے کے دوران اپنی ٹیم کی حمایت کرنے کے لئے ریستوران، ہوٹل اور دیگر جگہوں پر بھی گئے ہوں گے جس سے یہ وائرس تیزی سے اور پھیلا ہو گا ۔

اس مقابلے میں ایٹلیٹکو میڈرڈ نے لیورپول کو تین-دوسے شکست دی تھی۔ ایٹلیٹکو نے میڈرڈ میں پہلا مرحلہ ایک۔صفرسے جیتا تھا۔ ایٹلیٹکو نے دوسرے مرحلے کی جیت سے گزشتہ فاتح لیورپول کو مقابلے سے باہر کر دیا۔