دہلی سنتوش ٹرافی کے گروپ مقابلہ کی میزبانی کرے گا، افتتاحی میچ تریپورہ سے 23 دسمبر کو

قطر میں اختتام پذیر ہوئے فیفا عالمی کپ کے سنسنی خیز فائنل مقابلہ کا ابھی بخار بھی نہیں اترا تھا کہ دہلی ساکر ایسوسی ایشن نے اعلان کیا کہ دہلی مردوں کا 76 ویں سینئر قومی مقابلہ سنتوش ٹرافی کے ایک گروپ کی میزبانی کر رہا ہے۔ فٹبال دہلی (ڈی ایس اے) کے عبوری صدر شرافت اللہ نے صحافیوں سے خطاب کرتے ہوئے بتایا کہ ’’36 ریاستوں کو 6 گروپوں میں رکھا گیا ہے، جبکہ فائنل میں ہر گروپ کی ٹاپر رہی ریاست، تین دوسرے نمبر کی سب سے بہترین ریاستیں اور ریلوے، سروسز و میزبان ٹیم آخری راؤنڈ میں کھیلے گی۔‘‘

انہوں نے بتایا کہ دہلی گروپ 1 میں ہے اور اس کے ساتھ لداخ، تریپورا، کرناٹکا، گجرات، اتراکھنڈ ہیں اور اس گروپ کے افتتاحی میچ میں میزبان دہلی کا مقابلہ تریپورہ سے 23 دسمبر کو دوپہر 12.30 بجے امبیڈکر اسٹیڈئم میں کھیلا جائے گا۔ اور ہر میچ کے دن تین میچ کھیلے جائیں گے جس میں ایک میچ امبیڈکر اسٹیڈئم میں کھیلا جائے گا۔

انہوں نے بتایا کہ دہلی حکومت سے اس ٹورنامنٹ کے انعقاد میں تعاون کے لئے بات چیت ہوئی تھی لیکن وقت کی کمی کی وجہ سے دہلی حکومت کی جانب سے تعاون نہیں ہو پایا۔ انہوں نے دہلی کی ٹیم کے تعلق سے بتایا کہ حسب روایت کل تک دہلی کی ٹیم کا اعلان کر دیا جائے گا۔

واضح رہے پریس کانفرنس میں فٹبال دہلی کے عبوری صدر شرافت اللہ، خزانچی لیاقت علی، جنرل سکریٹری آکاش نرولا، سنتوش ٹرافی کے آرگنائزنگ سکریٹری رضوان الحق اور سنتوش ٹرافی کی میڈیا کمیٹی کے چیئرمین راجندر ساجوان نے صحافیوں سے خطاب کیا۔