سوشانت سنگھ معاملہ: سی بی آئی نے دِشا سالیان کی موت کی جانچ کرنے کا کیا فیصلہ

سی بی آئی اب سوشانت سنگھ کی موت کے ساتھ ان کی سابق منیجر دِشا سالیان کی موت کے درمیان کنکشن تلاش کرنے کی کوشش کر رہی ہے۔ اس لیے سی بی آئی نے فیصلہ کیا ہے کہ دِشا سالیان کی موت معاملہ کی بھی جانچ کی جائے گی۔ دراصل سی بی آئی یہ جاننے کی کوشش کر رہی ہے کہ کیا دِشا سالیان کی موت کا سوشانت کیس سے کوئی لینا دینا ہے۔ اس کے لیے دشا کی کمپنی سے تعلق رکھنے والے بنٹی سچدیو سے سی بی آئی کے افسران پوچھ تاچھ کریں گے۔

'زی نیوز' میں شائع ہوئی ایک خبر کے مطابق سی بی آئی نے دشا سالیان معاملہ کی جانچ شروع کرتے ہوئے سب سے پہلے اس کی کمپنی کے مالک بنٹی سچدیو کو پوچھ تاچھ کے لیے ڈی آر ڈی او گیسٹ ہاؤس میں بلایا ہے۔ بنٹی سچدیو اداکار سہیل خان کی بیوی کے بھائی ہیں۔ قابل ذکر ہے کہ دشا سلیبرٹی مینجمنٹ کمپنی میں کام کرتی تھیں جو وراٹ کوہلی سمیت بہت سارے کرکٹرس سے لے کر کئی بالی ووڈ ہستیوں کے پی آر کا کام دیکھتی ہے۔ موت سے پہلے دِشا سالیان سوشانت سنگھ راجپوت کی ایک فلم کا پی آر سنبھال رہی تھیں۔