ریئل کشمیر فٹبال کلب: عزم و محبت کی سچی داستان، سونی لِو پر جلد دستیاب ہوگی

ممبئی: او ٹی ٹی پلیٹ فارم سونی لِو اپنے ناظرین کے لیے ایک نئی اور متاثر کن کہانی لانے جا رہا ہے۔ یہ سیریز ’ریئل کشمیر فٹبال کلب‘ کی تشکیل پر مبنی ہے، جو کشمیر میں پروفیشنل فٹبال کی ایک تاریخ ساز کوشش کو پیش کرتی ہے۔ اس سیریز میں محمد ذیشان ایوب اور مانو کول جیسے باصلاحیت فنکار اہم کردار ادا کریں گے۔

اتوار کو اس ڈرامہ سیریز کا پہلا پری ویو جاری کیا گیا۔ میکرز نے اس موقع پر تحریر کیا، ’’یہ کہانی ہے نئے خواب دیکھنے والوں کی، اجنبیوں کے میل جول کی اور مشکلات سے مقابلہ کرنے کی۔ سب سے بڑھ کر یہ کھیل، کشمیر اور امکانات کی کہانی ہے۔‘‘

ٹیزر میں دکھایا گیا ہے کہ کس طرح دو افراد نے کشمیر میں ایک فٹبال کلب کی بنیاد رکھنے کے لیے اپنی جان لڑا دی۔ یہ ویڈیو محض ایک کھیل کی شروعات نہیں بلکہ اس جدوجہد، دوستی اور یقین کو بیان کرتی ہے جس نے کشمیر کے نوجوانوں کو ایک پلیٹ فارم فراہم کیا۔

کہانی کا آغاز ذیشان ایوب کے کردار سے ہوتا ہے، جو ایک سرکاری افسر کے ساتھ کشمیر کی صورتحال پر بحث کرتے ہیں۔ انہیں جب ایک نئے فٹبال ٹورنامنٹ کے بارے میں علم ہوتا ہے جس میں پورے ملک کی ٹیمیں حصہ لے رہی ہیں تو وہ فیصلہ کرتے ہیں کہ کشمیر کی نمائندگی کے لیے اپنی ٹیم بنائی جائے۔ اس مشن کو حقیقت میں بدلنے کے لیے جدوجہد، قربانی اور عزم کو مرکزی موضوع بنایا گیا ہے۔

یہ سیریز حقیقی واقعات سے متاثر ہے اور ان دو افراد کی انسپائرنگ داستان بیان کرتی ہے جنہوں نے کشمیر کا پہلا پروفیشنل فٹبال کلب قائم کیا۔ اس کلب نے نہ صرف ریاست بلکہ پورے ملک میں ایک نئی امید جگائی اور انڈین سپر لیگ میں جگہ بنا کر تاریخ رقم کی۔

سیریز کو جیو انٹرٹینمنٹ اور اوشون انٹرٹینمنٹ نے مشترکہ طور پر پروڈیوس کیا ہے، جبکہ اس کی ہدایت کاری مشہور فلم ساز مہیش متھائی اور راجیش ماپُسکر نے کی ہے۔ کاسٹ میں محمد ذیشان ایوب اور مانَو کول کے ساتھ ساتھ ابھیشانت رانا بھی شامل ہیں۔ فی الحال اس سیریز کی ریلیز کی تاریخ کا باضابطہ اعلان نہیں کیا گیا ہے، تاہم امکان ہے کہ جلد ہی اسے پیش کر دیا جائے۔

یاد رہے کہ ریئل کشمیر فٹبال کلب دراصل ایک حقیقی پروفیشنل ٹیم ہے جس کی بنیاد 2016 میں سری نگر میں رکھی گئی تھی۔ یہ ٹیم موجودہ دور میں انڈین سپر لیگ میں بھی حصہ لیتی ہے اور کشمیر کے نوجوانوں کو کھیل کے میدان میں نئی شناخت دینے میں نمایاں کردار ادا کر رہی ہے۔

یہ سیریز نہ صرف کھیل کے شائقین کو متاثر کرے گی بلکہ عام ناظرین کو بھی حوصلہ اور امید کا پیغام دے گی۔ اس کے ذریعے کشمیر کی نئی نسل کے خوابوں اور امکانات کو ایک نئے زاویے سے اجاگر کیا گیا ہے۔