راجکمار ہیرانی کی فلم ’ڈنکی‘ میں کام کریں گے شاہ رخ، دلچسپ ویڈیو کے ذریعے انکشاف

’پٹھان‘ کے بعد شاہ رخ خان کے اگلے پروجیکٹ کا اعلان کر دیا گیا ہے۔ کنگ خان بالی ووڈ کے مشہور فلمساز راجکمار ہیرانی کے ایک پ’ڈنکی‘ نامی روجیکٹ کے لیے ساتھ آ رہے ہیں

تصویر سوشل میڈیا
تصویر سوشل میڈیا
user

قومی آوازبیورو

ممبئی: سپر اسٹار شاہ رخ خان کے مداحوں کے لیے خوشخبری ہے۔ ’پٹھان‘ کے بعد شاہ رخ خان کے اگلے پروجیکٹ کا اعلان کر دیا گیا ہے۔ کنگ خان بالی ووڈ کے مشہور فلمساز راجکمار ہیرانی کے ایک پ’ڈنکی‘ نامی روجیکٹ کے لیے ساتھ آ رہے ہیں۔

یہ ہندوستانی سنیما میں پہلی بار ہونے جا رہا ہے جب بالی ووڈ کے یہ دو قدآور ایک ساتھ کام کرنے جا رہے ہیں۔ اس فلم کا اعلان شاہ رخ خان نے اپنے سوشل میڈیا ہینڈل پر کیا ہے۔ کنگ خان نے راجکمار ہیرانی کو اپنا سانتا کلاز قرار دیا ہے۔ فلم کے اعلان کی ویڈیو کافی مضحکہ خیز اور پیاری ہے۔ جس میں شاہ رخ راجکمار ہیرانی کی فلم میں کام کرنے کی خواہش کا اظہار کرتے نظر آ رہے ہیں۔ پھر جب ہدایت کار نے فلم کی پیشکش کی تو فلم کا ٹائٹل سن کر شاہ رخ خان کنفیوز ہوگئے۔


خیال رہے کہ انگریزی کے ڈنکی لفظ کے معنی گدھا ہوتے ہیں لیکن راجکمار ہیرانی شاہ رخ خان سے یہ واضح کر دیتے ہیں یہ گدھا والا ڈنکی (Donkey) نہیں ہے بلکہ یہ دوسرا ڈنکی (Dunki) ہے۔

شاہ رخ خان کا اس بارے میں کہنا ہے ’’راجکمار ہیرانی اس نسل کے بہترین فلمسازوں میں سے ایک ہیں۔ ہم نے ہمیشہ ایک ساتھ کام کرنے کی بات کی ہے اور مجھے بہت خوشی ہے کہ ہم آخر کار ڈنکی کے ساتھ ایسا کر رہے ہیں۔ ہم نے فلم کی شوٹنگ اسی ماہ شروع کی ہے اور میں اس کے ہر لمحے کی قدر کر رہا ہوں۔ راجو کے لیے، میں گدھا، بندر، کچھ بھی بن سکتا ہوں!"

اس فلم کو جیو اسٹوڈیو، ریڈ چلیز انٹرٹینمنٹ اور راجکمار ہیرانی فلمز مشترکہ طور پر پیش کریں گے۔ وہیں، فلم کی ہدایت کاری راجکمار ہیرانی کر رہے ہیں۔ فلم میں شاہ رخ خان اور تاپسی پنو مرکزی کردار میں ہیں۔ فلم کی باقی تفصیلات کو خفیہ رکھا گیا ہے، فلم 22 دسمبر 2023 کو ریلیز ہوگی۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔