ڈرگ کنکشن: ریا چکرورتی کی درخواست ضمانت منظور، بھائی شووک کی عرضی خارج

ریا چکرورتی کو بامبے ہائی کورٹ نے راحت دیتے ہوئے مشروط ضمانت دے دی ہے، تاہم ریا کے بھائی شووک چکرورتی کی درخواست ضمانت نامنظور کر دی گئی ہے

ریا چکرورتی / تصویر یو این آئی
ریا چکرورتی / تصویر یو این آئی
user

قومی آوازبیورو

ممبئی: سوشانت سنگھ راجپوت کی موت کے بعد پیدا ہونے والے ڈرگ کنکشن معاملہ میں کئی دنوں سے جیل میں قید بالی ووڈ کی اداکارہ ریا چکرورتی کو بڑی راحت ملی ہے۔ بامبے ہائی کورٹ نے ریا کی درخواست ضمانت مشروط طور پر منظور کرلی ہے۔ وہیں ریا کے بھائی شووک کی درخواست مسترد کردی گئی ہے۔ عدالت نے منشیات فروش باسط پریہار کی ضمانت کی عرضی بھی مسترد کر دی ہے۔

ریا چکرورتی کو ایک لاکھ کے نجی مچلکہ پر ضمانت دی گئی ہے اور انہیں اپنا پاسپورٹ جمع کروانا ہوگا۔ علاوہ ازیں ریا کو ممبئی سے باہر جانے کے لئے منظوری لینی ہوگی۔ جب بھی ریا کو پوچھ گچھ کے لئے بلایا جائے گا انہیں حاضر ہونا ہوگا۔

واضح رہے کہ ریا کو 8 ستمبر کو این سی بی نے گرفتار کیا تھا۔ ان پر الزام ہے کہ انہوں نے سوشانت سنگھ راجپوت کے لئے منشیات کی خریداری کی تھی۔ دعویٰ کیا جا رہا ہے کہ ریا اور اس کے بھائی کی متعدد منشیات فروشوں کے ساتھ بات چیت ہوتی تھی اور ان کی مبینہ چیٹ کی تفصیلات بھی منظر عام پر آئی تھیں۔

این ڈی پی ایس کی خصوصی عدالت نے 11 ستمبر کو پانچ ملزمان کی درخواست ضمانت مسترد کر دی تھی۔ اس کے بعد ان تمام ملزمان نے بامبے ہائی کورٹ سے رجوع کیا تھا۔ 29 ستمبر کو بامبے ہائی کورٹ نے سبھی کی ضمانت کی درخواستوں پر فیصلہ محفوظ رکھا تھا۔

ریا پر این سی بی کی گرفت اس وقت سخت ہو گئی تھی جب ان کی منشیات سے متعلق چیٹ منظر عام پر آئی تھی۔ تاہم، ریا نے اپنے ایک انٹرویو میں کہا تھا کہ انہوں نے کبھی بھی منشیات نہیں لی اور وہ ٹیسٹ کروانے کے لئے تیار ہیں۔ ریا اور شووک کے خلاف سنگین شواہد ملنے کے بعد این سی بی نے دونوں کو گرفتار کرلیا تھا۔ میڈیا رپورٹوں کے مطابق این سی بی کی پوچھ گچھ میں ریا نے مبینہ طور پر بالی ووڈ کی بہت سی مشہور شخصیات کے ڈرگ کنکشن اور منشیات پارٹی کا انکشاف کیا۔ ریا نے منشیات کے معاملے میں دیپیکا پادوکون، سارہ علی خان اور رکول پریت کا نام لیا تھا اور این سی بی ان تینوں اداکاراؤں سے پوچھ گچھ کر چکی ہے۔

next