یو پی بورڈ: ہائی اسکول میں گوتم اور انٹر میڈیٹ میں تنو کا اول مقام

پریاگ راج: اترپردیش سیکنڈری ایجوکیشن کونسل (یو پی بورڈ) کی جانب سے سنیچر کو اعلان کردہ رزلٹ میں ہائی اسکول میں کانپور کے گوتم رگھونشی اور انٹرمیڈیٹ میں باغپت کے تنو تومر نے سب سے زیادہ نمبرات حاصل کر کے ریاست میں اول مقام حاصل کیا ہے۔

کانپور کے اونکاریشور ایس بی این انٹر کالج کے گوتم رگھونشی نے ہائی اسکول میں 97.17 فیصد نمبرات حاصل کیے ہیں جبکہ باغپت کے بڑوت کی شری رام ایس ایم انٹر کالج کی تنو تومر نے انٹرمیڈیٹ میں 97.80 فیصد نمبرات حاصل کر کے پوری ریاست میں اول مقام حاصل کیا۔

الہ آباد صدر دفتر بورڈ کے انچارج ڈائریکٹر ونے کمار پانڈے اور اترپردیش بورڈ کی سکریٹری نینا شریواستو نے ہائی اسکول اور انٹر میڈیٹ امتحانات۔2019 کے نتائج سنیچر دوپہر 12:30 بجے اعلان کیے۔ ہائی اسکول میں کل 80.07 فیصد جبکہ انٹرمیڈیٹ میں 70.06 فیصد طلبا نے کامیابی حاصل کی۔

دسویں کلاس کے 21 ٹاپروں میں تین بچے باربنکی سے تعلق رکھتے ہیں۔ 12 ویں کی ٹاپر تنو تومر باغپت سے ہیں جبکہ دوسرے نمبر پر آنے والی بھاگیہ شری اپادھیائے کا تعلق گونڈہ سے ہے۔ چوتھے نمبر پر آنے والے یوراج بھی باغپت سے ہیں۔ اٹاوہ کی زینب بھی میرٹ لسٹ میں جگہ بنانے میں کامیاب رہی ہیں، انہوں نے نواں مقام حاصل کیا ہے۔

بارہویں کلاس میں بھی بارابنکی اور گونڈہ چھائے رہے وہیں مئو، فتح پور، ایودھیا اور سنت کبیر نگر جیسے اضلاع کے بچوں نے نام روشن کیا ہے۔ دلچسپ بات یہ ہے کہ 12ویں کے 14 ٹاپروں میں سے آٹھ لڑکیاں ہیں جبکہ 10ویں کی فہرست میں لڑکوں نے بازی ماری ہے۔

ہائی اسکول کی میرٹ میں نواں مقام حاصل کرنے والی نے انٹرنیٹ کا مثبت استعمال کر کے مثال پیش کر دی ہے۔ انہیں سوشل میڈیا سے پرہیز ہے لیکن انہوں نے انٹر نیٹ کا سہارا لے کر یہ کامیابی حاصل کی ہے۔ زینب نے 94.50 فیصد نمبرات حاصل کیے ہیں اور وہ کافی خوش ہیں۔

لوہا منڈی جسونت نگر، ضلع اٹاوہ کے رہائشی محمد وکیل کی بیٹی زینب نے جسونت نگر کے سگھر سنگھ انٹر کالج سے ہائی اسکول کا امتحان دیا۔ ہفتہ کے روز جب نتیجہ آیا تو ان کی خوشی کا ٹھکانا نہ رہا۔ زینب نے 600 میں سے 567 نمبرات حاصل کیے ہیں۔ زینب کے والد دکان چلاتے ہیں اور ان کی والدہ افسانہ گھریلو خاتون ہیں، چھوٹا بھائی دانش چھٹی کلاس میں زیر تعلیم ہے۔

(یو این آئی ان پٹ کے ساتھ)