امسالہ یورو وژن: جرمنی سے ’لارڈ آف دا لوسٹ‘ بینڈ حصہ لے گا

گیتوں کا یورو وژن مقابلہ (Eurovision Song Contest) یا ESC پورے یورپ کا میوزک کا اہم ترین ایونٹ ہوتا ہے، جو درجنوں ممالک میں براہ راست دکھایا جاتا ہے۔ طویل تیاریوں کے بعد اس میں کسی بھی ملک کی نمائندگی کے لیے کسی ایک فنکار یا گروپ کا انتخاب کیا جاتا ہے، جو فائنل میں اپنے ملک کی نمائندگی کرتا ہے۔

جرمنی سے امسالہ مقابلے کے برطانیہ کے شہر لیورپول میں 13 مئی کو ہونے والے فائنل میں نمائندگی کے لیے شمالی جرمنی کے بندرگاہی شہر ہیمبرگ کے مشہور روک میوزک بینڈ 'لارڈ آف دا لوسٹ‘ کا انتخاب کیا گیا ہے۔

اپنی نوعیت کے 67 ویں یورو وژن مقابلے کے لیے جرمنی سے منتخب کردہ روک بینڈ کی خاص بات اس کا میوزک ہی نہیں بلکہ اس کے فنکاروں کے بہت بھڑکیلے ملبوسات اور ان کے بہت ہی شاندار اور مختلف قرار دیے جانے والے کنسرٹس بھی ہیں۔

یورو وژن 2023ء میں جرمنی سے حتمی طور پر کون حصہ لے گا، اس انتخاب کا ابتدائی مرحلہ شہر کولون میں مکمل کیا گیا، جس میں آٹھ مختلف فنکاروں اور میوزک بینڈز نے حصہ لیا۔ اس مرحلے میں فتح 'لارڈ آف دا لوسٹ‘ نامی روک بینڈ کو ملی اور اب دیکھا یہ جانا ہے کہ لیورپول میں یورو وژن کے فائنل میں اس جرمن میوزک گروپ کی کارکردگی کیسی رہتی ہے اور اس فائنل کو درجنوں ممالک میں لائیو دیکھنے والے کروڑوں شائقین کس بینڈ کو امسالہ یورپی چیمپیئن قرار دیتے ہیں۔

'لارڈ آف دا لوسٹ‘ کے حتمی انتخاب سے قبل ہی یہ اندازے بھی لگائے جا رہے تھے کہ یہ بینڈ ہی لیورپول میں جرمنی کی نمائندگی کرے گا۔ اس لیے کہ اس بینڈ کا ایک البم 'بلڈ اینڈ گلِٹر‘ حال ہی میں عوامی پسندیدگی کے اعتبار سے جرمن چارٹس میں پہلے نمبر پر آ گیا تھا۔

اس جرمن میوزک بینڈ کی ایک خاص بات اسے حاصل عالمی شہرت بھی ہے اور یہ گروپ روک میوزک لیجنڈ آئرن میڈن کے ہمراہ ورلڈ ٹور بھی کر چکا ہے۔

یہ کہ یورو وژن کے فائنل میں جرمنی کی نمائندگی اسی میوزک گروپ کو کرنا چاہیے، اس کا فیصلہ دو طرح سے رائے دہی کے نتیجے میں کیا گیا۔ ابتدائی مرحلے کے پہلے نصف پوائنٹ اس گروپ کو ایک ایسی بین الاقوامی جیوری نے دیے، جس میں آٹھ ممالک کے ماہرین شامل تھے۔ دوسرے مرحلے میں جرمن شائقین نے بھی اکثریتی رائے سے اس امر کی حمایت کر دی کہ امسالہ یورو وژن فائنل میں جرمنی سے 'لارڈ آف دا لوسٹ‘ ہی کو جانا چاہیے۔

یورو وژن یورپی گیتوں کا ایک سالانہ مقابلہ ہے، جو گزشتہ برس یوکرین کے کالُوش آرکیسٹرا نے جیتا تھا۔ روایت یہ ہے کہ فاتح فنکار یا گروپ کا ملک ہی اگلے برس اس یورپی مقابلے کی میزبانی کرتا ہے۔

تاہم یوکرین کی جنگ کے باعث منتظمین نے امسالہ مقابلے کے فائنل کو یوکرین سے برطانیہ منتقل کرنے کا فیصلہ کیا تھا۔ ای ایس سی مقابلے کا اہتمام یورپی براڈکاسٹنگ یونین (EBU) کی طرف سے کیا جاتا ہے۔