معروف شامی ادیب اور حکومتی ناقد خالد خلیفہ کا انتقال

کئی برسوں سے خانہ جنگی کے شکار عرب ملک شام کے دارالحکومت دمشق سے اتوار یکم اکتوبر کو ملنے والی نیوز ایجنسی اے ایف پی کی رپورٹوں میں بتایا گیا ہے کہ خالد خلیفہ کے ایک بہت قریبی دوست نے بھی ان کی موت کی تصدیق کر دی ہے۔

پیدائشی طور پر خالد خلیفہ کا تعلق شامی صوبے حلب کے قصبے مریمین سے تھا۔ وہ ایک معروف ناول نگار بھی تھے اور ٹی وی ڈرامے لکھنے والے ایک کامیاب مصنف بھی۔ اس کے علاوہ ان کے کالم باقاعدگی سے کئی عربی اخبارات میں بھی شائع ہوتے تھے۔ انہیں عرب دنیا کے کئی اعلیٰ ادبی اعزازات سے بھی نوازا گیا تھا۔

خالد خلیفہ کے ایک قریبی دوست اور زندگی کے آخری دنوں میں اس شامی ادیب کے ساتھ کافی زیادہ وقت گزارنے والے صحافی یاروب الیسا نے بتایا، ''ہفتے کے روز انتقال کے وقت خالد خلیفہ دمشق میں اپنے گھر پر اور اکیلے تھے۔ ہم نے انہیں کئی مرتبہ فون کیا اور ہمیں کوئی جواب نہ ملا۔ اس کے بعد ہم ان کے گھر گئے اور دیکھا کہ وہ اپنے صوفے پر بیٹھے تھے اور ان کا انتقال ہو چکا تھا۔‘‘

بعد ازاں شامی دارالحکومت کے عباسین ہسپتال کے ڈاکٹروں نے ان کی لاش کے معائنے کے بعد کہا کہ خالد خلیفہ کا انتقال حرکت قلب بند ہو جانے سے ہوا تھا۔

خالد خلیفہ کو ملنے والی شہرت کا آغاز 1990ء کی دہائی کے اوائل میں شامی ٹیلی وژن سے نشر ہونے والی ایک بہت مقبول ڈرامہ سیریز سے ہوا تھا، جو انہوں نے لکھی تھی۔ وہ شام میں حکمران بعث پارٹی کے کڑے ناقدین میں شمار ہوتے تھے اور اپنے اخباری کالموں میں بھی اکثر دمشق میں حکمرانوں پر کھل کر تنقید کرتے تھے۔

اس شامی ادیب کی خاص بات یہ تھی کہ ان کا اپنے وطن کے حکمرانوں سے متعلق موقف بڑا واضح تھا لیکن 2011ء میں پہلے حکومت مخالف عوامی مظاہروں کے آغاز اور پھر ان کے ایک باقاعد خانہ جنگی کی شکل اختیار کر لینے کے بعد بھی ان کا فیصلہ یہی تھا کہ وہ اپنا وطن چھوڑ کر بیرون ملک نہیں جائیں گے۔ اس بارے میں انہوں نے 2019ء میں دیے گئے اپنے ایک انٹرویو میں کہا تھا، ''میں اب بھی یہاں اس لیے رہتا ہوں کہ یہ میرا ملک ہے۔ میں یہیں پیدا ہوا تھا۔ اور میں یہیں مرنا چاہتا ہوں۔‘‘

خالد خلیفہ کی مشہور ترین تصنیفات میں سے ایک ان کا 2006ء میں شائع ہونے والا ناول 'نفرت کی مدح میں‘ بھی ہے۔ اس ناول کو عرب فکشن کے بین الاقوامی انعام کے لیے شارٹ لسٹ بھی کیا گیا تھا۔ عرب دنیا کا یہ ادبی انعام عرف عام میں عرب بکر پرائز بھی کہلاتا ہے۔ خلیفہ کا یہ ناول دنیا کی مختلف زبانوں میں ترجمہ بھی ہو چکا ہے۔ یہ ناول حلب سے تعلق رکھنے والی ایک ایسی جوان شامی خاتون کے بارے میں ہے، جو اپنی بےربط زندگی سے نکلنے کے لیے ایک جہادی تنظیم میں شامل ہو جاتی ہے۔

2013ء میں خالد خلیفہ کا ایک اور ناول شائع ہوا تھا، جس کا عنوان تھا: ''اس شہر کے باورچی خانوں میں کوئی چاقو نہ ہوں۔‘‘ اس ناول پر انہیں نجیب محفوظ لٹریچر پرائز سے نوازا گیا تھا، جو مصر کے اعلیٰ ترین ادابی اعزازات میں سے ایک ہے۔