ورلڈ کپ 2019: امپائر دھرم سینا نے مانا، انگلینڈ کو اوور تھرو میں 6 رنز دینا تھی ایک بڑی غلطی

ایک انٹرویو میں امپائر دھرم سینا نے کہا، جب میں نے میچ کا وہ حصہ میچ ختم ہونے کے بعد ٹی وی ری پلے میں دیکھا تو مجھے احساس ہوا کہ مجھ سے اس وقت ایک بڑی غلطی ہوئی تھی۔

تصویر سوشل میڈیا
تصویر سوشل میڈیا
user

قومی آوازبیورو

آئی سی سی ورلڈ کپ 2019 کے فائنل میں انگلینڈ اور نیوزی لینڈ کے درمیان کھیلے گئے ٹورنامنٹ کے سب سے زیادہ دلچسپ میچ میں سپر اوور کے بعد برابر رنز ہونے کے باوجود زیادہ باونڈری لگانے کے قوانین کے مطابق انگلینڈ ٹیم کے طور پر دنیا کو نیا عالمی چیمپئن ملا تھا، اس میچ میں انگلینڈ کی جیت کافی تنازعات میں رہی تھی، اب اوور تھرو کے بعد انگلینڈ کو 6 رنز دینے والے اس میچ کے سری لنکائی امپائر کمار دھرم سینا نے بھی تسلیم کیا ہے کہ اوور تھرو پر 6 رن دینے کا ان کا فیصلہ غلط تھا۔

میچ کے 50 ویں اوور کے دوران نیوزی لینڈ کے مارٹن گپٹل کا تھرو بین اسٹوکس کے بلے سے لگ کر باؤنڈری کے پار چلا گیا تھا، جس کے بعد امپائر کمار دھرمسینا نے انگلینڈ کو 6 رن دے دیئے تھے، انگلینڈ نے 10 وکٹوں کے نقصان پر نیوزی لینڈ سے اسکور برابر کر لیا تھا، جس کے بعد میچ میں سپر اوور کرایا گیا، حالانکہ سپر اوور میں بھی جب کوئی نتیجہ نہیں نکلا تو انگلینڈ کو زیادہ باؤنڈری لگانے کی بنیاد پر فاتح قرار دیا گیا تھا۔

6 رنز دیئے جانے کے فیصلے کو سابق امپائر سائمن ٹوفل سمیت کرکٹ دنیا کی کئی بڑی ہستیووں نے غلط ٹھرايا، انہوں نے کہا کہ انگلینڈ کو چھ رن دینا بالکل غلط تھا کیونکہ گیند پھینکے جانے کے وقت بلے باز دوسرے رن کے لئے نہیں بھاگے تھے۔

ایک اخبار کو دیئے گئے انٹرویو میں امپائر دھرم سینا نے کہا، ’’جب میں نے اس میچ کا وہ حصہ میچ کے بعد ٹی وی ری پلے میں دیکھا تو مجھے احساس ہوا کہ مجھ سے اس وقت غلطی ہوئی تھی‘‘۔

دھرم سینا نے کہا، ’’کرکٹ گراؤنڈ پر ہمارے پاس ٹی وی ری پلے جیسے وسائل موجود نہیں تھے اور مجھے اپنے اس فیصلے کا ذرا بھی افسوس نہیں ہے‘‘۔ دھرم سینا نے کہا کہ انہوں نے دوسرے امپائروں سے پوچھنے کے بعد ہی 6 رن دیئے تھے۔ انہوں نے کہا، ’’میں نے اس وقت وائرلیس فون سے لیگ امپائر سے اس بارے میں پوچھا، میری یہ بات سب امپائروں اور میچ کے ریفری نے سنی تھی، لیکن وہ ٹی وی ری پلے نہیں دیکھ سکتے تھے تو ان سب نے اس بات کا یقین کیا کہ بلے باز نے دوسرا رن مکمل کر لیا ہے، اس کے بعد میں نے اپنا فیصلہ لیتے ہوئے 6 رن دیئے‘‘۔

دھرم سینا کے فیصلے کو مکمل طور پر غلط بتاتے ہوئے سابق آسٹریلوی امپائر سائمن ٹوفل نے کہا تھا کہ کیونکہ بلے باز نے اپنا دوسرا رن مکمل نہیں کیا تھا، تو امپائر کے 6 رنز دینے کا فیصلہ مکمل طور پر ایک بہت بڑی غلطی تھی۔

Published: 21 Jul 2019, 8:10 PM
next