وراٹ کوہلی نے روہت کے ساتھ تلخی کی خبروں کو بتایا ’بکواس‘

روہت کے ساتھ اختلافات کی خبروں پر وراٹ نے کہا کہ اگر میں کسی شخص کو پسند نہیں کرتا ہوں تو یہ بات آپ میرے چہرے پر پڑھ سکتے ہیں یا اسے میرے رویے میں دیکھ سکتے ہیں۔ میں نے ہمیشہ روہت کی تعریف کی ہے۔

تصویر سوشل میڈیا
تصویر سوشل میڈیا

یو این آئی

ممبئی: ہندوستانی کپتان وراٹ کوہلی نے پیر کو واضح طور پر کہا کہ ان کے اور ون ڈے نائب کپتان روہت شرما کے درمیان کوئی اختلاف نہیں ہے۔ وراٹ نے ویسٹ انڈیز کے دورے کے لیے روانہ ہونے سے پہلے پیر کو پریس کانفرنس میں صاف طور پر کہہ دیا کہ ٹیم میں کوئی اختلاف نہیں ہے۔ وراٹ کے ساتھ موجود کوچ روی شاستری نے ان خبروں کو لغو قرار دیا۔ عالمی کپ میں ٹیم انڈیا کے سیمی فائنل میں باہر ہونے کے بعد ایسی خبریں آنے لگی تھیں کہ ٹیم میں اندرونی اختلافات ہے اور وراٹ اور ون ڈے ٹیم کے نائب کپتان روہت کے درمیان اختلافات ہیں۔ ان اختلافات میں وراٹ کی بیوی انوشکا شرما اور روہت کی بیوی رتیکا ساجده کو بھی شامل کر لیا گیا تھا۔ یہ خبریں برابر آ رہی تھیں کہ ان کھلاڑیوں کی بیویاں سوشل میڈیا پر کرکٹروں کو ان فالو کر رہی ہیں۔

ہندستانی کپتان سے جب ٹیم میں اختلافات کے بارے میں سوال پوچھا گیا تو انہوں نے کہا کہ گزشتہ چند دنوں میں میں نے بھی ایسا سنا ہے۔ یہ سب کچھ باہر سے سننے کو ملتا ہے۔ لیکن میں یہ بتانا چاہتا ہوں کہ اگر ٹیم کے اندر ماحول اچھا نہیں ہوتا تو گزشتہ دو تین برسوں میں ہم ہر شکل میں ویسی اچھی کارکردگی نہیں کر پاتے جیسا ہم مسلسل کر رہے ہیں۔ ڈریسنگ روم کا ماحول بہت اچھا ہے اور یہی وجہ ہے کہ ہماری کارکردگی میں تسلسل رہتا ہے۔

روہت کے ساتھ اختلافات کی خبروں پر وراٹ نے کہا کہ اگر میں کسی شخص کو پسند نہیں کرتا ہوں تو یہ بات آپ میرے چہرے پر پڑھ سکتے ہیں یا اسے میرے رویے میں دیکھ سکتے ہیں۔ میں نے ہمیشہ روہت کی تعریف کی ہے کیونکہ مجھے یقین ہے کہ وہ ایک اچھے شخص ہیں۔ ہمارے درمیان کوئی اختلاف نہیں ہے۔ یہ عجیب سی بات ہے کہ ایسی خبریں کہاں سے آتی ہیں اور ایسی باتوں سے کس کو فائدہ ہوتا ہے۔

کوچ شاستری نے کپتان سے اتفاق کرتے ہوئے کہا کہ ٹیم تمام فارمیٹ میں اچھا مظاہرہ کر رہی ہے اور یہ تسلسل ایک اچھے ٹیم ماحول کی وجہ سے ہے۔ شاستری نے کچھ سخت الفاظ میں اس طرح کی خبروں کو لغو قرار دیا۔ ہندوستانی کرکٹ کنٹرول بورڈ نے کل ایک ریلیز جاری کر کے بتایا تھا کہ ویسٹ انڈیز کے دورے پر جانے سے قبل کپتان وراٹ پریس کانفرنس سے خطاب کریں گے لیکن جب پریس کانفرنس شروع ہوئی تو وراٹ کے ساتھ شاستری بھی موجود تھے۔ شاستری کا کوچ کے طور پر یہ آخری دورہ ہے اور اس دورے کے بعد ہندستانی ٹیم کا نیا کوچ منتخب کیا جائے گا۔