وراٹ نے توڑا دھونی کا ریکارڈ اور بارڈر کی برابری

اندور: کامیابی کے رتھ پر سوار ہندوستانی کپتان وراٹ کوہلی نے اننگز کے فرق سے سب سے زیادہ میچ جیتنے کا مہندر سنگھ دھونی کا ہندوستانی ریکارڈ توڑ دیا اور ساتھ ہی انہوں نے آسٹریلیا کے ایلن بارڈر کے ریکارڈ کی برابری بھی کر لی۔

وراٹ کی قیادت میں دنیا کی نمبر ایک ٹیم ہندوستان نے گزشتہ روز پہلے کرکٹ ٹیسٹ میں بنگلہ دیش کو تیسرے ہی دن اننگز اور 130 رن کے بڑے فرق سے شکست دے دی۔ وراٹ کی اپنی کپتانی میں 52 میچوں میں یہ 32 ویں فتح ہے۔ وراٹ کی کپتانی میں ہندوستان نے 10 ویں بار اننگز سے کامیابی حاصل کی اور اس جیت کے ساتھ ہی وہ مہندر سنگھ دھونی سے آگے نکل گئے ہیں جنہوں نے اپنی کپتانی میں نو ٹیسٹ، اننگز کے فرق سے جیتے تھے۔

محمد اظہرالدین نے آٹھ ٹیسٹ اور سورو گنگولی نے سات ٹیسٹ اننگز کے فرق سے جیتے تھے۔ وراٹ نے اس کے ساتھ ہی مسلسل تین ٹیسٹ اننگز کے فرق سے جیتنے کے اظہرالدین کے ریکارڈ کی بھی برابری کر لی۔ اظہر کی کپتانی میں ہندوستان نے 1992۔93 اور 1993۔94 میں مسلسل تین ٹیسٹ، اننگز کے فرق سے جیتے تھے۔

وراٹ کی کپتانی میں ہندوستان کی یہ مسلسل چھٹی کامیابی ہے اور انہوں نے مسلسل چھ ٹیسٹ جیتنے کے دھونی کے ریکارڈ کی برابری بھی کرلی ہے۔ وراٹ نے ویسٹ انڈیز سے دو، جنوبی افریقہ سے تین گھریلو ٹیسٹ اور بنگلہ دیش سے ایک ٹیسٹ جیتا ہے۔ دھونی نے 2013 میں آسٹریلیا کے خلاف چار ٹیسٹ اور ویسٹ انڈیز کے خلاف دو ٹیسٹ جیتے تھے۔

ہندوستان نے مسلسل تین ٹیسٹ، اننگز اور 100 سے زائد رنوں کے فرق سے جیتنے کے آسٹریلیا اور پاکستان کے ریکارڈ کی بھی برابری کر لی ہے۔ آسٹریلیا نے 1930۔31 میں ونڈیز کے خلاف اور پاکستان نے 2001۔02 میں بنگلہ دیش کے خلاف مسلسل تین ٹیسٹ، اننگز اور 100 سے زائد رنوں کے فرق سے جیتے تھے۔

اپنی کپتانی میں 32 ویں جیت سے وراٹ نے آسٹریلیا کے تجربہ کار کپتان ایلن بارڈر کی برابری بھی کر لی ہے۔ بارڈر نے 1984۔94 کے درمیان 93 ٹسٹ میچوں میں آسٹریلیا کی کپتانی کی تھی اور 32 ٹیسٹ جیتے تھے۔ کپتانی میں سب سے زیادہ ٹیسٹ جیتنے کے معاملے میں وراٹ سے آگے ویسٹ انڈیز کے کلائیو لائڈ (36 ٹیسٹ)، اسٹیو وا (41)، رکی پونٹنگ (48) اور گریم اسمتھ (53) ہیں۔