انڈر-19 عالمی کپ: سیمی فائنل میں آسٹریلیا نے پاکستان کو 1 وکٹ سے ہرایا، فائنل میں ہندوستان سے ہوگا مقابلہ

انڈر-19 کرکٹ عالمی کپ میں آج دوسرا سیمی فائنل مقابلہ آسٹریلیا اور پاکستان کے درمیان کھیلا گیا جو سانسیں روک دینے والا ثابت ہوا۔ آخری اوور میں یہ مقابلہ آسٹریلیا نے ایک وکٹ سے جیت لیا اور فائنل میں انٹری کر لی۔ جو کرکٹ شیدائی امید لگائے بیٹھے تھے کہ فائنل مقابلہ ہندوستان اور پاکستان کے درمیان دیکھنے کو ملے گا، انھیں مایوسی ہاتھ لگی۔ لیکن اس کے ساتھ ہی ہندوستانی ٹیم کے پاس موقع ہے کہ آسٹریلیا کو شکست دے کر عالمی کپ فاتح بن جائے اور وَنڈے عالمی کپ میں سینئر ٹیم کو ملی شکست کا بدلہ لے۔ فائنل مقابلہ 11 فروری یعنی اتوار کو کھیلا جائے گا۔

آج کے میچ میں ایک وقت ایسا لگ رہا تھا جیسے آسٹریلیا میچ میں پیچھے ہو گیا ہے، لیکن آخری اوورس میں راف میک ملن نے اچھی بلے بازی کا مظاہرہ کرتے ہوئے پاکستان کو ٹورنامنٹ سے باہر کا راستہ دکھا دیا۔ پاکستان نے آسٹریلیا کو 180 رنوں کا ہدف دیا تھا جو کہ بہت بڑا نہیں تھا، لیکن جواب میں آسٹریلیا نے جب 164 کے اسکور پر نواں وکٹ گنوایا تو پاکستان کے لیے جیت قریب دکھائی دے رہی تھی۔ ایسے وقت میں راف میک ملن نے 29 گیندوں پر ناٹ آؤٹ 19 رن بنائے اور ان کا ساتھ کیلم ولڈر نے دیا جو 9 گیندوں پر 2 رن بنا کر ناٹ آؤٹ رہے۔

پاکستان کی طرف سے بلے بازی کی بات کی جائے تو اذان اویس نے 91 گیندوں پر 52 رن اور عرافات منہاس نے 61 گیندوں پر 52 رنوں کی اننگ کھیلی جس سے اسکور 179 تک پہنچ سکا۔ پاکستان نے 48.5 اوورس کھیلے اور سبھی کھلاڑی آؤٹ ہو گئے۔ آسٹریلیا کی طرف سے ٹام اسٹریکر نے خطرناک گیندبازی کی جنھوں نے 9.5 اوورس میں محض 24 رن دے کر 6 کھلاڑیوں کو آؤٹ کیا۔ اس بہترین کارکردگی کے لیے انھیں پلیئر آف دی میچ کا ایوارڈ ملا۔

آسٹریلیا کی بلے بازی کی بات کریں تو سلامی بلے باز ہیری ڈکسن نے 75 گیندوں پر 50 رن اور اولیور پیک نے 75 گیندوں پر 49 رنوں کی شاندار اننگ کھیلی۔ ان کے علاوہ ٹام کیمپبل نے 25 رنوں کی اور میک ملن نے ناٹ آؤٹ 19 رنوں کی اننگ کھیلی۔ آسٹریلیا نے جیت کے لیے ضروری رن 49.1 اوورس میں 9 وکٹ کے نقصان پر حاصل کر لیا۔ پاکستان کی طرف سے گیندبازی میں علی رضا نے شاندار مظاہرہ کیا۔ انھوں نے 10 اوورس میں 34 رن دے کر 4 کھلاڑیوں کو پویلین بھیجا۔ عرافات منہاس کی بھی تعریف کرنی ہوگی جنھوں نے بلے بازی کے بعد گیندبازی میں بھی شاندار مظاہرہ کیا اور 10 اوورس میں محض 20 رن دے کر 2 کھلاڑیوں کو آؤٹ کیا۔