آئی سی سی نے جاری کیا ٹی-20 عالمی کپ کا شیڈول، 17 اکتوبر کو ہوگا آغاز

آئی سی سی کے مطابق ٹی-20 عالمی کپ کے سبھی مقابلے یو اے ای اور عمان کے 4 اسٹیڈیمز میں ہوں گے جن کے نام ہیں دوبئی انٹرنیشنل اسٹیڈیم، شیخ زائد اسٹیڈیم، شارجہ اسٹیڈیم اور عمان کرکٹ اکیڈمی گراؤنڈ۔

تصویر سوشل میڈیا
تصویر سوشل میڈیا
user

تنویر

بین الاقوامی کرکٹ کونسل (آئی سی سی) نے منگل کے روز ٹی-20 عالمی کپ کا شیڈول جاری کر دیا۔ یہ ٹورنامنٹ ہندوستان میں ہونے والا تھا لیکن گزشتہ دنوں اسے یو اے ای اور عمان میں منتقل کیے جانے کا اعلان کیا گیا تھا۔ اب اس ٹورنامنٹ کے تعلق سے پوری تفصیل دیتے ہوئے آئی سی سی نے بتایا کہ اس کا آغاز 17 اکتوبر سے ہوگا جو کہ 14 نومبر کو انجام پائے گا۔ گویا کہ تقریباً ایک ماہ یہ ٹورنامنٹ چلے گا اور 14 نومبر کو چمپئن بننے کے لیے دو ٹیمیں فائنل میچ کھیلیں گی۔

آئی سی سی کے مطابق ٹی-20 عالمی کپ کے سبھی مقابلوں کا انعقاد یو اے ای اور عمان کے 4 اسٹیڈیمز میں ہوگا۔ ان اسٹیڈیمز کے نام ہیں دوبئی انٹرنیشنل اسٹیڈیم، ابوظہبی کا شیخ زائد اسٹیڈیم، شارجہ اسٹیڈیم اور عمان کرکٹ اکیڈمی گراؤنڈ۔ آئی سی سی کے کارگزار سی ای او جیوف ایلارڈس نے کہا کہ ’’ہماری ترجیح ٹی-20 عالمی کپ کو محفوظ طریقے سے منعقد کرانا ہے۔ حالانکہ ہندوستان میں اس کا انعقاد نہ ہونے سے ہم مایوس ہیں۔ ہم بی سی سی آئی، امارات کرکٹ بورڈ اور عمان کرکٹ کے ساتھ مل کر کام کریں گے تاکہ یہ یقینی بنایا جا سکے کہ شیدائی کرکٹ کے شاندار ایونٹ کا لطف اٹھا سکیں۔‘‘


بی سی سی آئی سربراہ سورو گانگولی نے اس تعلق سے کہا کہ ’’بی سی سی آئی، یو اے ای اور عمان میں آئی سی سی ٹی-20 عالمی کپ کی میزبانی کرنے کے لیے پرجوش ہے۔ ہمیں زیادہ خوشی ہوتی اگر یہ ہندوستان میں ہوتا، لیکن کووڈ-19 کے حالات کو دیکھتے یہ فیصلہ لیا گیا ہے۔ بی سی سی آئی اس ٹورنامنٹ کی میزبانی یو اے ای اور عمان میں کرتا رہے گا۔ بی سی سی آئی اس کے لیے پوری طرح تیار ہے۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔