ٹی-20 ورلڈ کپ: افغانستان کو شکست دے کر نیوزی لینڈ سیمی فائنل میں پہنچا، ہندوستان باہر

نیوزی لینڈ کی اس جیت کے ساتھ ہندوستان سیمی فائنل کی دوڑ سے باہر ہوگیا ہے۔ ہندوستان پیر کے روز نامیبیا سے اپنا آخری عالمی کپ مقابلہ کھیلے گا لیکن اب اس کی ساری امیدیں ختم ہوچکی ہیں۔

تصویر آئی اے این ایس
تصویر آئی اے این ایس
user

یو این آئی

ابوظہبی: نیوزی لینڈ نے افغانستان کو 11 گیندیں باقی رہتے اتوار کے روز آٹھ وکٹ سے شکست دے کر ٹی ٹوئنٹی عالمی کپ کے گروپ دو سے سیمی فائنل میں جگہ بنالی، جبکہ نیوزی لینڈ کی اس جیت کے ساتھ ہندوستان سیمی فائنل کی دوڑ سے باہر ہوگیا ہے۔ ہندوستان پیر کے روز نامیبیا سے اپنا آخری عالمی کپ مقابلہ کھیلے گا لیکن اب اس کی ساری امیدیں ختم ہوچکی ہیں۔

نجیب اللہ زدران کی 48 گیندوں پر چھ چوکوں اور تین چھکوں کی مدد سے 73 رن کی شاندار اننگز کے باوجود، افغانستان ٹی ٹوئنٹی ورلڈ کپ میں نیوزی لینڈ کے خلاف گروپ 2 کے مقابلے میں 20 اوورز میں آٹھ وکٹوں پر صرف 124 رنز ہی بنا سکا۔ نیوزی لینڈ نے 18.1 اوور میں دو وکٹ پر 125 رنز بنا کر یک طرفہ جیت حاصل کر لی۔


زادران کے علاوہ کوئی اور افغان بلے باز پچ پر ٹھہر نہ سکا۔ گلبدین نائب نے 18 گیندوں پر ایک چوکے کی مدد سے 15 رن اور کپتان محمد نبی نے 20 گیندوں میں بغیر کسی باؤنڈری کے 14 رن بنائے۔ افغانستان کی ٹیم صرف 19 رن پر اپنی تین وکٹیں گنوانے کے بعد میچ میں واپس نہ آ سکی۔

زادران نے نائب کے ساتھ چوتھی وکٹ کے لیے 37 اور نبی کے ساتھ پانچویں وکٹ کے لیے 59 رن جوڑے۔ نبی کی وکٹ 18ویں اوور کی آخری گیند پر گری۔ افغانستان نے چھ رن کے وقفے میں تین وکٹیں گنوا دیں، جس سے اس کی ایک اچھے اسکور پر جانے کی امید ٹوٹ گئی۔ راشد خان اننگز کی آخری گیند پر آؤٹ ہوئے۔ نیوزی لینڈ کی جانب سے بائیں ہاتھ کے تیزگیندباز ٹرینٹ بولٹ نے 17 رن پر تین وکٹ اور ٹم ساؤتھی نے 24 رن پر دو وکٹیں حاصل کیں۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔