ٹی-20 ورلڈ کپ فائنل: سنجو، ابھیشیک اور ایشان کی نصف سنچریاں، ہندوستان نے نیوزی لینڈ کو دیا 256 رن کا ہدف

ٹی-20 ورلڈ کپ 2026 کے فائنل میں ہندوستانی بلے بازوں نے شاندار اور جارحانہ بیٹنگ کا مظاہرہ کرتے ہوئے نیوزی لینڈ کے سامنے رنوں کا پہاڑ کھڑا کر دیا۔ احمد آباد کے نریندر مودی اسٹیڈیم میں کھیلے جا رہے اس اہم مقابلے میں ہندوستان نے مقررہ 20 اوور میں 5 وکٹ کے نقصان پر 255 رن بنائے اور کیوی ٹیم کو جیت کے لیے 256 رن کا بڑا ہدف دیا۔

اس مقابلے میں نیوزی لینڈ نے ٹاس جیت کر پہلے گیندبازی کا فیصلہ کیا تھا لیکن ہندوستانی اوپنرز نے ابتدا ہی سے جارحانہ انداز اپناتے ہوئے کیوی گیندبازوں کو دباؤ میں ڈال دیا۔ ابھیشیک شرما اور سنجو سیمسن نے ٹیم کو تیز رفتار آغاز فراہم کیا اور پاور پلے کے دوران مسلسل باؤنڈریز کے ذریعے اسکور کو آگے بڑھایا۔

چوتھے اوور میں لاکی فرگوسن کی گیندبازی پر ہندوستانی اوپنرز نے زبردست حملہ کرتے ہوئے ایک ہی اوور میں 24 رن بٹور لیے، جس کے بعد ٹیم کا اسکور 5 کے پار پہنچ گیا۔ اس مرحلے کے بعد ابھیشیک شرما نے مزید جارحانہ انداز اختیار کیا اور صرف 18 گیندوں پر اپنی نصف سنچری مکمل کر لی۔ چھ اوور کے اختتام تک ہندوستان کا اسکور بغیر کسی نقصان کے 92 رن ہو چکا تھا اور نیوزی لینڈ کے گیندباز واضح طور پر دباؤ میں دکھائی دے رہے تھے۔

تاہم آٹھویں اوور میں نیوزی لینڈ کو پہلی کامیابی اس وقت ملی جب رچن رویندر نے ابھیشیک شرما کو آؤٹ کر دیا۔ انہوں نے صرف 21 گیندوں پر 52 رن کی دھماکہ خیز اننگز کھیلی جس میں کئی چوکے اور چھکے شامل تھے۔ اس وکٹ کے باوجود ہندوستانی بیٹنگ کی رفتار میں کمی نہیں آئی اور ٹیم نے اسی اوور میں 100 رن کا ہندسہ بھی عبور کر لیا۔

اس کے بعد سنجو سیمسن نے ذمہ داری سنبھالتے ہوئے شاندار بیٹنگ کا مظاہرہ کیا اور 33 گیندوں پر اپنی نصف سنچری مکمل کی۔ یہ اس ٹورنامنٹ میں ان کی لگاتار تیسری نصف سنچری تھی۔ انہوں نے میدان کے چاروں طرف دلکش شاٹس کھیلتے ہوئے اسکور کو تیزی سے آگے بڑھایا۔

دوسری جانب ایشان کشن نے بھی جارحانہ انداز میں بیٹنگ کرتے ہوئے ٹیم کے اسکور کو نئی رفتار دی۔ انہوں نے صرف 23 گیندوں پر اپنی نصف سنچری مکمل کی اور تیز رفتار بیٹنگ کے ذریعے ٹیم کو 200 رن کے قریب پہنچا دیا۔ پندرہویں اوور تک ہندوستانی ٹیم نے 200 رن کا ہندسہ عبور کر لیا تھا اور بڑے اسکور کی بنیاد مضبوط ہو چکی تھی۔

سولہویں اوور میں نیوزی لینڈ کے آل راؤنڈر جیمس نیشم نے شاندار گیندبازی کرتے ہوئے میچ میں سنسنی پیدا کر دی۔ انہوں نے ایک ہی اوور میں 3 اہم وکٹیں حاصل کیں۔ پہلے سنجو سیمسن 46 گیندوں پر 89 رن بنا کر آؤٹ ہوئے، اس کے بعد ایشان کشن 54 رن بنا کر پویلین لوٹ گئے اور پھر ہندوستانی کپتان سوریہ کمار یادو بھی بغیر کوئی رن بنائے آؤٹ ہو گئے۔ اس اوور کے بعد ہندوستان کا اسکور 16 اوور میں 4 وکٹ پر 204 رن تھا۔

بعد ازاں ہاردک پانڈیا اور تلک ورما نے اننگز کو سنبھالنے کی کوشش کی لیکن 19ویں اوور میں پانڈیا بھی آؤٹ ہو گئے۔ اس کے باوجود ہندوستانی بلے بازوں نے آخری اوور میں زبردست انداز میں رنز بٹورے۔ شیوم دوبے نے جیمس نیشم کے اوور میں چھکوں اور چوکوں کی بارش کرتے ہوئے 24 رن بنا ڈالے۔ دوبے نے صرف 8 گیندوں پر 26 رن کی جارحانہ اننگز کھیلی جس کی بدولت ہندوستان کا اسکور 255 رن تک پہنچ گیا۔

اس طرح ہندوستان نے فائنل میں نیوزی لینڈ کے سامنے 256 رن کا مشکل ہدف رکھ دیا ہے۔ اب کیوی ٹیم کو ٹی-20 ورلڈ کپ کا خطاب جیتنے کے لیے ایک بڑے اسکور کا تعاقب کرنا ہوگا، جو اس اہم مقابلے میں آسان نظر نہیں آتا۔