ٹی-20 عالمی کپ 2022: افغانستان کو بہ آسانی شکست دے کر انگلینڈ کا فاتحانہ آغاز، سیم کرن نے لیے 5 وکٹ

ٹی-20 عالمی کپ 2022 کے سپر-12 مقابلے کی شروعات ویسی نہیں رہی، جیسا کہ لوگ امید لگائے بیٹھے تھے۔ سپر-12 کے پہلے مقابلے میں جہاں نیوزی لینڈ نے دفاعی چمپئن آسٹریلیا کو بہ آسانی 89 رنوں سے شکست دے دی، وہیں دوسرے مقابلے میں انگلینڈ نے افغانستان کو 5 وکٹ سے شکست دے کر فاتحانہ آغاز کیا۔

ٹاس جیت کر انگلینڈ کے کپتان جوس بٹلر نے پہلے گیندبازی کا فیصلہ کیا۔ افغانستان کی بلے بازی شروع سے ہی دھیمی نظر آئی اور لگاتار وقفہ پر وکٹ بھی گرتے رہے۔ نتیجہ یہ ہوا کہ پوری ٹیم 19.4 اوور میں 112 رن بنا کر آؤٹ ہو گئی۔ 113 رن کا ہدف انگلینڈ نے 5 وکٹ کے نقصان پر 11 گیند باقی رہتے حاصل کر لیا۔

افغانستانی ٹیم کی بلے بازی سے متعلق بات کی جائے تو پاور پلے میں وہ محض 35 رن بنا سکی اور 2 وکٹ بھی گنوا دیے۔ کچھ افغانی بلے باز وکٹ پر ٹھہرے ضرور، لیکن وہ رنوں کے لیے ترستے نظر آئے۔ انگلینڈ نے لگاتار کسی ہوئی گیندبازی کی اور اس کا نتیجہ یہ ہوا کہ جس بھی بلے باز نے بڑا شاٹ لگانے کی کوشش کی، اس نے اپنا وکٹ گنوا دیا۔ افغانستان کی طرف سے سب سے زیادہ 32 رن ابراہیم زردان نے بنائے، اور عثمان غنی نے پھر 30 رن کا تعاون دیا۔ انگلینڈ کی طرف سے سیم کرن نے 3.4 اوور میں 10 رن دے کر سب سے زیادہ 5 وکٹ لیے۔ اس کے ساتھ ہی ٹی-20 بین الاقوامی کرکٹ میں سیم کرن پانچ وکٹ لینے والے پہلے انگلش گیندباز بن گئے۔

جب انگلینڈ کی ٹیم 113 رنوں کے ہدف کا پیچھا کرنے اتری تو اس کی بھی شروعات بہت اچھی نہیں رہی۔ لیکن کم رنوں کی وجہ سے اسے جیت حاصل کرنے میں کبھی بھی دقت کا سامنا نہیں کرنا پڑا۔ شروعاتی پانچ اوور میں انگلینڈ نے کپتان جوس بٹلر کا وکٹ گنوا دیا تھا۔ جارحانہ بلے بازی کے لیے مشہور انگلش ٹیم پاور پلے میں صرف 40 رن بنا سکی۔ 14ویں اوور تک انگلینڈ کے 4 وکٹ گر گئے تھے اور 81 رن بنے تھے۔ اس کے بعد بھی افغانستانی گیندبازوں نے کسی ہوئی گیندبازی کی، لیکن بورڈ پر اتنے رن نہیں تھے کہ مقابلہ کیا جا سکے۔ انگلینڈ کی طرف سے سب سے زیادہ 29 رن (ناٹ آؤٹ) لیام لیونگسٹن نے بنائے۔ باقی بلے بازوں نے چھوٹی چھوٹی لیکن اہم پاریاں کھیلیں جس سے جیت حاصل کرنے میں کوئی پریشانی نہیں ہوئی۔