روکے نہیں رُک رہے ’رو-کو‘! وَنڈے بلے بازی رینکنگ میں روہت نمبر-1 پر برقرار، چھلانگ مار کر نمبر-2 پر پہنچے کوہلی

ہندوستان کے 2 مایہ ناز بلے باز روہت شرما اور وراٹ کوہلی کرکٹ کے ٹی-20 اور ٹیسٹ فارمیٹ کو الوداع کہہ چکے ہیں، لیکن وَنڈے کرکٹ میں ان کی خوب طوطی بول رہی ہے۔ حالت کچھ ایسی ہے کہ حریف گیندبازوں کی لاکھ کوششوں کے بعد بھی ’رو-کو‘ یعنی روہت اور کوہلی رُکتے ہوئے نظر نہیں آ رہے ہیں۔ اس کا اندازہ پہلے آسٹریلیا اور اب جنوبی افریقہ کے خلاف وَنڈے سیریز میں صاف طور پر دیکھنے کو ملا۔ جنوبی افریقہ کے خلاف تو وراٹ کوہلی نے 3 میچوں میں 2 سنچری اور ایک نصف سنچری کی بدولت 302 رن بنا ڈالے۔ اس کا انعام انھیں آئی سی سی کی تازہ جاری وَنڈے رینکنگ میں ملا ہے۔ وہ دوسرے مقام پر قابض ہو گئے ہیں۔ پہلے مقام پر روہت شرما برقرار ہیں، جنھوں نے جنوبی افریقہ کے خلاف 2 نصف سنچری کی مدد سے 3 میچوں میں 146 رن بنائے تھے۔

وراٹ کوہلی جنوبی افریقہ کے خلاف ہندوستان کی وَنڈے سیریز سے قبل وَنڈے رینکنگ میں چوتھے مقام پر تھے۔ 3 میچوں میں ان کے ذریعہ بنائے گئے 302 رنوں کی بدولت انھیں پلیئر آف دی سیریز کا انعام ملا تھا، اور اب وہ 773 ریٹنگ پوائنٹس کے ساتھ بلے بازی رینکنگ میں 2 مقام کی چھلانگ کے ساتھ 2 نمبر پر پہنچ گئے ہیں۔ اب ان سے آگے صرف روہت شرما ہیں، جن کے 781 ریٹنگ پوائنٹس ہیں۔ روہت شرما نے پہلے مقام پر اپنا قبضہ برقرار رکھا، کیونکہ انھوں نے بھی جنوبی افریقہ کے خلاف سیریز میں 2 نصف سنچری اسکور کی۔

وَنڈے بلے بازی رینکنگ کے ٹاپ-10 کی بات کریں، تو اس میں 4 ہندوستانی کھلاڑی شامل ہیں۔ روہت شرما اور وراٹ کوہلی کے علاوہ جنوبی افریقہ کے خلاف وَنڈے سیریز کھیلنے سے محروم رہنے والے شبھمن گل نے پانچواں مقام محفوظ رکھا ہے، لیکن ان کے اور بابر اعظم کے ریٹنگ پوائنٹس میں صرف ایک پوائنٹ کا فرق ہے۔ ٹاپ-10 میں چوتھے ہندوستانی بلے باز شریئس ایر ہیں، جو ایک مقام کھسک کر دسویں مقام پر چلے گئے ہیں۔ ہندوستان کے وکٹ کیپر بلے باز کے ایل راہل کو 2 مقام کا فائدہ ہوا ہے، جس سے انھوں نے وَنڈے بلے بازی رینکنگ میں بارہواں مقام حاصل کر لیا ہے۔ یعنی وہ ٹاپ-10 کی فہرست میں داخل ہونے سے چند قدم ہی دور ہیں۔

وَنڈے بلے بازی رینکنگ کی بات کریں، تو جنوبی افریقہ کے خلاف یک روزہ سیریز میں بہترین گیندبازی کا فائدہ کلدیپ یادو کو ملا ہے۔ ہندوستانی اسپنر کلدیپ یادو نے 3 میچوں میں 9 وکٹ لے کر پوری سیریز کے سب سے کامیاب گیندباز رہے تھے۔ اس کارکردگی کی بدولت وَنڈے گیندبازی رینکنگ میں وہ تیسرے مقام پر پہنچ گئے ہیں۔ کلدیپ وَنڈے گیندبازی رینکنگ کی ٹاپ-10 لسٹ میں واحد ہندوستانی ہیں۔ رویندر جڈیجہ 2 مقام پھسل کر 16ویں مقام پر چلے گئے ہیں۔ اکشر پٹیل کو گیندبازی رینکنگ میں نقصان پہنچا ہے، لیکن عرشدیپ سنگھ نے 29 مقامات کی چھلانگ لگا کر 66واں مقام حاصل کر لیا ہے۔