ڈبلیو سی ایل 2025: ڈیویلیئرس کے طوفان میں اُڑ گیا پاکستان، جنوبی افریقہ بنا ڈبلیو سی ایل چمپئن

اے بی ڈیویلیئرس نے 41 سال کی عمر میں ایک بار پھر کمال کر دیا ہے۔ پوری طرح فٹ نہیں ہونے کے باوجود انہوں نے اپنے زبردست مظاہرہ سے جنوبی افریقہ چمپئنس کو ڈبلیو سی ایل-2025 کا چمپئن بنا دیا۔ ڈیویلیئرس کی قیادت والی جنوبی افریقہ کی ٹیم نے ڈبلیو سی ایل کے فائنل میں پاکستان چمپئنس کو 9 وکٹ سے شکست دے دی۔ جیت کے ہیرو خود کپتان ڈیویلیئرس رہے جنہوں نے ٹورنامنٹ کی تیسری سنچری بناتے ہوئے ناقابل تسخیر 120 رنوں کی اننگز کھیلی۔

پاکستانی ٹیم نے پہلے بلے بازی کرتے ہوئے مقررہ 20 اوور میں 5 وکٹ کے نقصان پر 195 رنوں کا بڑا اسکور بناتے ہوئے افریقی ٹیم کو 196 رنوں کا ہدف دیا تھا۔ لیکن اس بڑے اسکور کو بونا ثابت کرتے ہوئے افریقی ٹیم نے صرف 16.5 اوور میں 1 وکٹ کے نقصان پر مقررہ ہدف حاصل کر لیا۔ ڈیویلیئرس کو ان کی شاندار بلے بازی کے لیے مین آف دی میچ اور پوری سیریز میں کمال کے مظاہرہ کے لیے پلیئر آف دی سیریز کے ایوارڈ سے نوازا گیا۔

ٹاس جیت کر پہلے بلے بازی کرنے اتری پاکستانی ٹیم کے لیے سلامی بلے باز شرجیل خان نے 76 رنوں کی شاندار پاری کھیلی۔ ان کو باقی بلے بازوں سے اتنا ساتھ نہیں ملا جس کی پاکستان کو ضرورت تھی۔ پاکستان کے لیے دوسرا سب سے بڑا اسکور عمر امین نے 36 رنوں کے طور پر بنایا۔ وہیں دیگر کوئی بلے باز 30 رن کے اسکور تک بھی نہیں پہنچ سکا۔

196 رنوں کے ہدف کا پیچھا کرنے اتری جنوبی افریقہ چمپئنس کی ٹیم کو اے بی ڈیویلیئرس اور ہاشم آملہ کی جوڑی نے طوفانی شروعات دی۔ پہلے وکٹ کے لیے دونوں نے صرف 6 اوور میں 72 رنوں کی شراکت داری کی۔ آملہ 14 گیندوں پر 18 رن بنا کر سعید اجمل کا شکار بنے۔

اس کے بعد بلے بازی کرنے آئے جے پی ڈومنی نے ڈیویلیئرس کا آخری تک بخوبی ساتھ دیا اور دونوں نے 19 گیند بازی رہتے ٹیم کو جیت دلا دی۔ ڈیویلیئرس نے صرف 60 گیندوں پر 120 رن بنائے، اس دوران انہوں نے 12 چوکے اور 7 آسمانی چھکے لگائے۔ وہیں دڈومنی نے بھی تیز طرار 50 رنوں کی اننگز کھیلی۔

 ہیمسٹرنگ انجری کی وجہ سے ڈیویلیئرس کا ایک پیر فٹ نہیں تھا مگر انہوں فائنل میں باہر بیٹھنے کے بجائے ٹیم کے لیے میدان میں اترنا بہتر سمجھا۔ انہوں نے پاکستان چمپئنس کے خلاف سنچری لگا کر فینس کو جھومنے کا بھرپور موقع دیا۔ اپنی بیوی اور بچوں کو بھی انہوں نے اپنی اننگز سے خوش کر دیا۔ ڈیویلیئرس کی اننگز کے دوران ان کے بیوی-بچوں کی تصویریں سوشل میڈیا پر خوب چھائی رہیں۔

واضح رہے کہ ہندوستان نے پاکستان کے خلاف سیمی فائنل مقابلہ کھیلنے سے انکار کر دیا تھا جس کے بعد پاک ٹیم کو سیدھے فائنل میں پہنچنے کا موقع ملا گیا۔ حالانکہ اس سال ڈبلیو سی ایل خطاب جیتنے کا اس کا خواب شرمندۂ تعبیر نہیں ہو سکا۔