ہار کے بعد پاکستان میں مچا کہرام، سرفراز کو کہا ’’کیپٹن مامو ہے‘‘

ہندوستان سے کراری شکست کے بعد پاکستانی عوام کا غصہ پاکستانی کپتان سرفراز کے خلاف پھوٹ پڑا ہے اور سوشل میڈیا پر انہیں ’کیپٹن مامو‘‘ کہا جا رہا ہے۔

تصویر سوشل میڈیا
تصویر سوشل میڈیا
user

قومی آوازبیورو

ہندوستان اور پاکستان کے درمیان کوئی بھی مقابلہ ہو اس کو لے کر دونوں ممالک کے عوام جذباتی ہو جاتے ہیں کل جب کرکٹ کے عالمی کپ کے مقابلہ میں دونوں ممالک ایک دوسرے کے سامنے آئے تو عوام کا توقع کے مطابق جذباتی ہونا فطری عمل تھا۔ پاکستانی ٹیم کی شکست کے بعد ہندوستان میں جہاں جشن کا ماحول ہے وہیں پاکستان میں عوام اپنی کرکٹ ٹیم کو کوس رہے ہیں اور کپتان سرفراز کی تو زبردست تنقید کر رہے ہیں۔ پاکستانی عوام جہاں سرفراز کی بلے بازی سے ناراض ہیں وہیں وہ ان کی کپتانی سے بھی بہت زیادہ ناخوش ہیں اور ٹاس جیتنے کے بعد پہلے فیلڈنگ کرنے کے فیصلہ کی جم کر تنقید کر تے نظر آ رہے ہیں۔

پاکستان کے سابق تینز گیند باز شعیب اختر نے ٹاس کے بعد فیلڈنگ کرنے کے فیصلہ پر کہا ’’پاکستان کو خود بیٹنگ کرنی چاہیے تھی۔ تاریخ گواہ ہے کہ پاکستان ہندوستان کے خلاف کبھی چیز نہیں کر پایا ہے پھر نہ جانے کیوں کپتان نے پہلے گیندبازی کرنے کا فیصلہ لیا‘‘۔


شعیب اتنے غصے میں تھے کہ انہوں نے کہا ’’ہماری مینجمنٹ بے وقوف ہے۔ ہمارا کپتان مینجمنٹ کے سامنے ’مامو‘ بنا ہوا ہے۔ اسے کچھ سمجھ نہیں آتا وہ کچھ نہیں کر سکتا اور دسویں جماعت کے بچے کی طرح ہے جسے کہتے ہیں جا کر کے آ‘‘۔

ایسا لگتا ہے پاکستانی کرکٹ ٹیم اپنے سابق کپتان اور ملک کے وزیر اعظم عمران خان کا مشورہ بھی نہیں مانتی جس سے محسوس ہوتا ہے کہ وہاں کی کرکٹ عمران مخالف ہے۔ عمران خان نے ٹیم انتظامیہ کو مشورہ دیا تھا کہ ٹاس جیتنے کی صورت میں ٹیم کو پہلے بلے بازی کر نی چاہیے لیکن کپتان سرفراز احمد نے ان کی بات نہیں مانی۔ عمران نے اپنی ٹیم سے نڈر ہو کر کھلے ذہن سے کھیلنے کے لئے کہا تھا لیکن میچ کے دوران ٹیم مستقل ڈری ڈری نظر آئی۔


کل کی شرمناک شکست کے بعد سوشل میڈیا پر سرفراز اور پاکستانی ٹیم کے خلاف سیلاب آ گیا ہے اور زبردست تنقید کی جا رہی ہے۔ زیادہ تر لوگوں نے شعیب اختر کی بات کو آگے بڑھاتے ہوئے سرفراز کو ’’مامو‘ کہہ کر ہی مخاطب کیا ہے۔


واضح رہے غیر یقینی موسم کی وجہ سے زیادہ تر کپتان ٹاس جیتنے کے بعد پہلے گیند بازی کرنا پسند کرتے ہیں اور یہ بھی حقیقت ہے کہ ان کپتانوں کا یہ داؤ الٹا پڑا ہے۔ دوسری جانب ہندوستان کی طاقت بلے بازی ہے اس لئے اگر اس کو بغیر کسی ہدف کے بلے بازی کرنے کا موقع ملے گا تواس کے لئے بڑا اسکور بنانے کا ایک سنہرا موقع ہوگا اور یہ موقع سرفراز نے انہیں پلیٹ میں سجا کر دے دیا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 17 Jun 2019, 12:10 PM