محمد سراج کو آئی سی سی نے ’پلیئر آف دی منتھ‘ کے ایوارڈ سے نوازا، انگلینڈ دورہ پر بہترین کارکردگی کا ملا انعام

ہندوستان کے تیز گیندباز محمد سراج کو ’آئی سی سی مینس پلیئر آف دی منتھ‘ کے اعزاز سے نوازا گیا ہے۔ اس ریس میں انھیں نیوزی لینڈ اور ویسٹ انڈیز کے خلاف سے سخت چیلنج کا سامنا تھا، لیکن آخر میں بازی ان کے نام رہی۔ انھیں اگست 2025 کے لیے ’آئی سی سی پلیئر آف دی منتھ‘ کا یہ ایوارڈ دیا گیا ہے۔ اس ایوارڈ کے لیے محمد سراج کے علاوہ اس ریس میں میٹ ہنری اور جائیڈن سیلس کا نام تھا، جو کہ نامزد کیے گئے تھے لیکن ہندوستانی تیز گیندباز کا پلڑا دونوں پر بھاری ثابت ہوا۔

قابل ذکر ہے کہ محمد سراج کا کردار انگلینڈ دورے پر ٹیسٹ سیریز کو ڈرا کرانے میں بہت اہم رہا تھا۔ 5 ٹیسٹ میچوں کی سیریز 2-2 سے برابر رہی تھی، جس میں محمد سراج گیند سے سب سے کامیاب رہے تھے۔ انھوں نے 5 ٹیسٹ میچوں کی 9 اننگز میں سب سے زیادہ 23 وکٹ لیے تھے۔ محمد سراج نے انگلینڈ کے خلاف سیریز میں 2 مرتبہ 5 وکٹ اور ایک مرتبہ 4 وکٹ لینے کا کارنامہ بھی انجام دیا تھا۔ انھوں نے 32.43 کی اوسط سے 23 وکٹ لیے تھے۔

انگلینڈ کے خلاف 5 ٹیسٹ میچوں کی سیریز میں سراج محض سب سے زیادہ وکٹ لینے والے کھلاڑی نہیں تھے، بلکہ انھوں نے سب سے زیادہ 1113 گیندیں بھی پھینکیں تھیں۔ سراج کو ’آئی سی سی پلیئر آف دی منتھ‘ کا ایوارڈ تک پہنچانے میں اوول ٹیسٹ میں ڈالے گئے اسپیل کا کردار نتیجہ خیز رہا۔ سیدھے لفظوں میں کہیں تو اگست میں یہی ایک ٹیسٹ رہا، جس میں وہ کھیلے اور جس کی وجہ سے انھیں اگست ماہ کا بہترین کھلاڑی قرار دیا گیا۔ اوول ٹیسٹ میں سراج نے دونوں اننگ ملا کر 21.11 کی اوسط سے 9 وکٹ لیے تھے۔ ان کی اس بہترین کارکردگی نے ہندوستانی ٹیم کو ٹیسٹ جیتنے کے ساتھ ساتھ سیریز کو ڈرا کرانے میں بھی مدد کی تھی۔ محمد سراج واحد ایسے ہندوستانی تیز گیندباز تھے جنھوں نے انگلینڈ کے خلاف سیریز میں سبھی ٹیسٹ میچ کھیلے تھے۔