انگلینڈ میں بہترین کارکردگی کا محمد سراج کو ملا انعام، ٹیسٹ کرکٹ میں اپنی بہترین رینکنگ حاصل کی

ہندوستانی تیز گیندباز محمد سراج کو انگلینڈ کے خلاف 5 میچوں کی ٹیسٹ سیریز میں شاندار کارکردگی کا زبردست فائدہ حاصل ہوا ہے۔ وہ آئی سی سی کی تازہ ٹیسٹ رینکنگ میں اپنے کیریئر کی بہترین رینکنگ پر پہنچ گئے ہیں۔ محمد سراج نے پانچویں ٹیسٹ میچ میں لاجواب گیندبازی کی تھی، جس سے وہ گیندبازی کی رینکنگ میں 15ویں مقام پر پہنچ گئے ہیں۔ محمد سراج کی خطرناک گیندبازی کا ہی اثر ہی تھا کہ ہندوستان نے آخری ٹیسٹ میچ 6 رن سے جیت لیا اور ہندوستان اس سیریز کو 2-2 سے ڈرا کرنے میں کامیاب رہا۔

محمد سراج نے پانچویں ٹیسٹ میچ میں مجموعی طور پر 9 وکٹ لیے تھے۔ اس بہترین کارکردگی کے بعد انھوں نے 12 مقام کی بہتری کے ساتھ 15ویں مقام پر پہنچ گئے ہیں۔ انگلینڈ کو پانچویں ٹیسٹ میچ کے آخری دن میچ اور سیریز جیتنے کے لیے 35 رنوں کی ضرورت تھی، جبکہ ہندوستان کو سیریز ڈرا کرانے کے لیے 4 وکٹ چاہیے تھے۔ سراج نے ایسے مشکل وقت میں محاذ سنبھالا اور 3 وکٹ اپنے نام کر انگلینڈ کو جیت حاصل کرنے سے روک دیا۔ سراج کے ٹیسٹ کیریئر کی اس سے پہلے بہترین رینکنگ 16 تھی جو انھوں نے رواں سال جنوری میں حاصل کی تھی۔

ٹیسٹ رینکنگ میں نمبر 1 گیندباز کی بات کی جائے، تو ہندوستانی تیز گیندباز جسپریت بمراہ کا اس مقام پر قبضہ برقرار ہے۔ وہ 889 پوائنٹس کے ساتھ رینکنگ میں سرفہرست ہیں۔ پرشدھ کرشنا بھی اپنے کیریئر کی سب سے بہترین رینکنگ یعنی 59ویں مقام پر پہنچ گئے ہیں۔

بلے بازوں کی بات کریں تو ہندوستان کے سلامی بلے باز یشسوی جیسوال اوول ٹیسٹ میں سنچری لگانے کے سبب ٹاپ-5 میں دوبارہ شامل ہو گئے ہیں۔ یشسوی نے 3 مقام کی بہتری کے ساتھ پانچویں مقام پر جگہ بنائی ہے۔ ان کے علاوہ ایک دیگر ہندوستانی بلے باز جو ٹاپ-10 میں شامل ہے، وہ رشبھ پنت ہیں۔ انھیں ایک مقام کا نقصان ہوا ہے اور وہ ساتویں سے آٹھویں مقام پر آ گئے ہیں۔

انگلینڈ کے کرشمائی بلے باز جو روٹ شاندار کارکردگی کی وجہ سے بلے بازوں کی رینکنگ میں نمبر 1 پر بنے ہوئے ہیں۔ پانچویں ٹیسٹ میں سنچری اسکور کرنے والے انگلینڈ کے دیگر بلے باز ہیری بروک کو ٹیسٹ بلے بازی رینکنگ میں دوسرا مقام حاصل ہو گیا ہے۔