جے پور میں تیار ہوگا دنیا کا تیسرا سب سے بڑا بین الاقوامی کرکٹ اسٹیڈیم

جے پور: راجستھان کرکٹ ایسوسی ایشن (آر سی اے) کے ذریعہ جے پور میں تجویز کردہ بین الاقوامی کرکٹ اسٹیڈیم ملک میں دوسرا سب سے بڑا اور دنیا کا تیسرا سب سے بڑا اسٹیڈیم ہوگا۔ آر سی اے سکریٹری مہیندر شرما نے بتایا کہ اس میں 75 ہزار شائقین کی گنجائش ہوگی جو گجرات کے موتیرا کرکٹ اسٹیڈیم اور آسٹریلیا کے میلبورن کرکٹ اسٹیڈیم کے بعد تیسرا بلند مقام ہے۔ یہ اسٹیڈیم دو مراحل میں تعمیر کیا جائے گا۔ پہلے مرحلے میں 45 ہزار ناظرین کی گنجائش ہوگی جبکہ دوسرے مرحلے میں اس کی گنجائش 75 ہزار ناظرین تک بڑھا دی جائے گی۔

انہوں نے بتایا کہ یہ اسٹیڈیم 100 ایکڑ اراضی پر تعمیر کیا جائے گا جس میں ایک کثیر مقصدی ٹریننگ اکیڈمی، جدید کلب ہاؤس جس میں انڈور کھیلوں کی سہولیات، چار ہزار کاروں کے لئے پارکنگ اور پبلک ٹرانسپورٹ کے لئے خصوصی جگہ تعمیر کی جائے گی۔

شرما نے کہا کہ اسٹیڈیم کے مشرق اور مغرب میں عوام کی سہولت کے لئے ریستوران سمیت دیگر سہولیات بھی فراہم کی جائیں گی۔ انہوں نے کہا کہ اسٹیڈیم میں 30 پریکٹس نیٹ کے ساتھ بین الاقوامی سطح کے دو میدان بھی ہوں گے۔ اس کے علاوہ ایک جدید ترین پریس کانفرنس روم ہوگا جس میں میڈیا کے لئے 250 نشستوں کی گنجائش ہوگی۔

انہوں نے کہا کہ راجستھان اسمبلی کے اسپیکر اور آر سی اے کے چیف سرپرست ڈاکٹر سی پی جوشی اور آر سی اے کے صدر ویبھو گہلوت کو جمعہ کے روز مہند اینڈ ایسوسی ایٹ اور اندور کے ایسوسی ایٹ اور دہلی کی اسپورٹس ڈیزائن کنسلٹنٹ فرم نے اس سلسلے میں اسٹیڈیم کی تعمیر کے بارے میں مکمل معلومات دی تھی۔

انہوں نے کہا کہ اس عالمی معیار کے گرین کرکٹ اسٹیڈیم میں بنیادی طور پر جدید ترین گرینڈ پویلین اسٹینڈ، کارپوریٹ باکس، عالمی سطح کے کھیلوں کے میدان، تمام کھیلوں کے شائقین کو اسٹیڈیم آنے والے تماشائیوں سمیت اعلی سطح کی سہولیات موجود ہوں گی۔

شرما نے بتایا کہ اس سے قبل آج راجستھان کرکٹ ایسوسی ایشن کے ایگزیکٹو کا ایک اجلاس آر سی اے اکیڈمی میں آر سی اے کے صدر ویبھو گہلوت کی صدارت میں ہوا جس میں متفقہ طور پر جے پور میں راجستھان کرکٹ ایسوسی ایشن کے اپنے بین الاقوامی کرکٹ اسٹیڈیم کی تعمیر ، آر سی اے ڈومیسٹک کرکٹ مقابلوں کا انعقاد ، انتخاب کمیٹی کے قیام کے لئے ضروری عمل شروع کرنے ، اور ریاست میں مختلف عمر گروپوں کی ٹیموں کے کوچوں اور کھیلوں کے عملے کی تقرری کا ایک نیا عمل شروع کرنے پر اتفاق کیا گیا۔