آئی پی ایل 2025: راجستھان کو 58 رنوں سے شکست دے کر ٹیبل ٹاپر بنی گجرات کی ٹیم

آئی پی ایل 2025 کے 23ویں میچ میں گجرات ٹائٹنس نے راجستھان رائلز کو 58 رنوں کے بڑے فرق سے ہرا کر خود کو پوائنٹس ٹیبل میں ٹاپ پر پہنچا دیا ہے۔ گجرات کے اس وقت 5 میچوں میں 4 فتح کے ساتھ 8 پوائنٹس ہو گئے ہیں، جبکہ راجستھان کو 5 میچوں میں 2 فتح کے ساتھ 4 پوائنٹس حاصل ہیں اور وہ ساتویں مقام پر پہنچ گئی ہے۔

آج ٹاس راجستھان کے کپتان سنجو سیمسن نے جیتا تھا اور پہلے گیندبازی کا فیصلہ کیا۔ جب گجرات کے کپتان شبھمن گل محض 2 رن بنا کر پویلین لوٹے تو ایسا لگا کہ سنجو کا فیصلہ ٹھیک تھا، لیکن اس کے بعد 2 بڑی شراکت داریوں نے بڑے اسکور کی بنیاد رکھ دی۔ سلامی بلے باز سائی سدرشن نے 53 گیندوں پر 82 رن، جوس بٹلر نے 25 گیندوں پر 36 رن اور شاہ رخ خان نے 20 گیندوں پر 36 رن بنائے۔ آخر میں راہل تیوتیا نے 12 گیندوں پر ناٹ آؤٹ 24 رنوں کی اننگ کھیل کر ٹیم کو 20 اوورس میں 6 وکٹ پر 217 رن تک پہنچا دیا۔ اس اسکور میں راشد خان کا بھی اہم تعاون رہا، کیونکہ انھوں نے محض 4 گیندوں پر تیز طرار 12 رن بنائے۔

راجستھان کی طرف سے جوفرا آرچر پچھلے میچ کی طرح آج بھی اچھی گیندبازی کرتے نظر آئے۔ انھوں نے 4 اوورس میں 30 رن دے کر ایک وکٹ حاصل کیا۔ تشار پانڈے (4 اوورس میں 53 رن) اور مہیش تیکشنا (4 اوورس میں 54 رن) کو 2-2 وکٹ ضرور حاصل ہوئے، لیکن دونوں کی ہی خوب پٹائی ہوئی۔ ایک وکٹ سندیپ شرما کو بھی حاصل ہوا جنھوں نے 4 اوورس میں 41 رن دیے۔

راجستھان کی جب بلے بازی شروع ہوئی تو لگاتار وقفہ پر وکٹ گرتے رہے، اس لیے کبھی بھی وہ جیت کے قریب پہنچتی دکھائی نہیں دی۔ راجستھانی ٹیم کی خراب بلے بازی کا اندازہ اسی بات سے لگایا جا سکتا ہے کہ 8 بلے باز دوہرے ہندسے تک بھی نہیں پہنچ پائے۔ کپتان سنجو سیمسن نے 28 گیندوں پر 41 رن، ریان پراگ نے 14 گیندوں پر 26 رن اور شمرن ہٹمائر نے 32 گیندوں پر 52 رنوں کا تعاون کیا۔ پوری ٹیم 19.2 اوورس میں 159 رن بنا کر پویلین لوٹ گئی۔ پرشدھ کرشنا نے آج اپنی گیندبازی سے کافی متاثر کیا۔ انھوں نے 4 اوورس میں 24 رن دے کر 3 کھلاڑیوں کو آؤٹ کیا۔ 2-2 وکٹ راشد خان اور سائی کشور کو ملے، جبکہ 1-1 وکٹ محمد سراج، ارشد خان اور کلونت کھجرولیا کے حصے میں آئے۔