ہندوستان کی نظریں ’ڈبلیو ٹی سی‘ فائنل پر، بنگلہ دیش کے خلاف ٹسٹ سیریز کا آغاز

چٹگاؤں: لوکیش راہل کی کپتانی میں ہندوستان کا بنگلہ دیش کے خلاف پہلا ٹیسٹ شروع ہو گیا ہے اور ٹیم انڈیا کی نظریں ورلڈ ٹیسٹ چیمپئن شپ (ڈبلیو ٹی سی) کے فائنل پر مرکوز ہیں۔

ڈبلیو ٹی سی فائنل سے پہلے، ہندوستان کو بنگلہ دیش کے خلاف دو ٹیسٹ اور آسٹریلیا کے خلاف گھر پر چار ٹیسٹ کھیلنے ہیں۔ ہندوستانی ٹیم اس وقت ڈبلیو ٹی سی ٹیبل میں چوتھے نمبر پر ہے اور فائنل میں پہنچنے کے لیے ان چھ میں سے صرف ایک میچ ہار سکتی ہے۔

بنگلہ دیش بھلے ہی ہندوستان سے کبھی ٹیسٹ کرکٹ نہ جیت سکا ہو، لیکن ہندوستان کے لیے پانچ ماہ بعد کھیل کے طویل ترین فارمیٹ میں جانا ایک بڑا چیلنج ہوگا۔ جسپریت بمراہ، محمد سمیع اور رویندر جڈیجہ جیسے تجربہ کار کھلاڑیوں کی غیر موجودگی میں کپتان راہل پر نسبتاً ناتجربہ کار ٹیم کی قیادت کرنے کا دباؤ بھی ہوگا۔ روی چندرن اشون اور امیش یادو بالنگ میں کچھ تجربہ کار ہیں، لیکن وہ بھی تقریباً ایک سال کے وقفے کے بعد ٹیسٹ ٹیم میں واپس آ رہے ہیں۔

بنگلہ دیش سات سال بعد کسی ٹیسٹ میچ میں ہندوستان کی میزبانی کر رہا ہے چٹگاؤں میں اپنے ریکارڈ کے تعلق سے پراعتماد ہو سکتا ہے۔ بنگلہ دیش نے اپنا آخری میچ مئی 2022 میں ظہور احمد چودھری اسٹیڈیم میں سری لنکا کے خلاف کھیلا، جہاں میزبان ٹیم نے 465 رنز بنائے۔

اس میچ کی طرح بنگلہ دیشی ٹیم کو اس ٹیسٹ میں بھی زخمی تسکین احمد اور شکیب الحسن کی کمی کا امکان ہے۔ ایسی صورتحال میں وکٹ کیپر بلے باز مشفق الرحیم اور لٹن داس پر بڑی اننگز کھیلنے کی ذمہ داری ہوگی جب کہ بالروں کی قیادت کرنے کا بوجھ عبادت حسین پر آ سکتا ہے۔

ہندوستان اپنے آخری پانچ ٹیسٹ میچوں میں سے تین ہار چکا ہے، جب کہ اس نے دو جیتے ہیں۔ دوسری جانب بنگلہ دیش اپنے آخری پانچ میں سے چار میچ ہار چکا ہے جبکہ ایک ڈرا ہوا ہے۔

ظہور احمد چودھری اسٹیڈیم کی ممکنہ فلیٹ پچ اور سرد موسم کی آمد کو مدنظر رکھتے ہوئے، ہندوستان اور بنگلہ دیش کے درمیان پہلے ٹیسٹ میچ میں بڑے اسکور بننے کی امید ہے۔