ہندوستان نے سیریز اپنے نام کی، راہل اور روہت کی نصف سنچریاں

ہندوستان نے مہمان ٹیم کو 20 اوور میں 153 رن پر روک دیا اور سلامی بلے بازوں کی ابتدائی شراکت کی بدولت 17.2 میں تین وکٹ پر 155 رن بنا کر میچ اور سیریز اپنے نام کر لی ۔

تصویر آئی اے این ایس
تصویر آئی اے این ایس
user

یو این آئی

سلامی بلے باز لوکیش راہل (65) اور کپتان روہت شرما (55) کی شاندار نصف سنچریوں اور ان کے درمیان 117 رن کی ابتدائی شراکت کی بدولت ہندوستان نے نیوزی لینڈ کو دوسرے ٹی 20 مقابلے میں سات وکٹوں سے شکست دے کر تین میچوں کی سیریز میں 2-0 کی ناقابل شکست برتری حاصل کرلی ۔

اگرچہ نیوزی لینڈ نے میچ میں تیز شروعات کی لیکن ہندوستانی گیند بازوں نے شاندار واپسی کرتے ہوئے مہمان ٹیم کو 20 اوور میں چھ وکٹ پر 153 رن پر روک دیا اور سلامی بلے بازوں کی ابتدائی شراکت کی بدولت 17.2 میں تین وکٹ پر 155 رن بنا کر میچ اور سیریز اپنے نام کر لی ۔ ہندوستان نے اس سیریز کے جیت سے نیوزی لینڈ سے یو اے ای میں حالیہ ٹی 20 ورلڈ کپ میں ملی شکست کا بدلہ بھی لے لیا۔


ہندوستان نے اس طرح رانچی میں مسلسل تیسرا ٹی 20 میچ جیت لیا ۔ ہدف کا تعاقب کرتے ہوئے ہندوستان کودونوں سلامی بلے بازوں نے اچھی شروعات دی ۔ راہل نے میچ میں تھرڈ مین پر چوکا لگا کراچھا آغاز کیا اور چھکا لگا کر اپنی 16ویں نصف سنچری مکمل کی، جبکہ روہت نے بھی چھکا لگا کر اپنی 25ویں نصف سنچری مکمل کی۔ راہل نے 49 گیندوں پر 65 رن میں چھ چوکے اور دو چھکے لگائے۔

روہت نے 36 گیندوں پر 55 رن میں ایک چوکا اور پانچ چھکے لگائے ۔ گزشتہ میچ میں نصف سنچری بنانے والے سوریہ کمار یادیو اس بار صرف ایک رن بنا کر ٹم ساؤتھی کا شکار بن گئے ۔ ساؤتھی نے چار اوور میں صرف 16 رن دے کر ہندوستان کے تینوں وکٹ لئے ۔ رشبھ پنت نے جیمزنیشام کی اننگز کے 18ویں اوور میں لگاتار دو چھکے لگا کر میچ کا فیصلہ ہندوستان کے حق میں کیا۔


اس سے قبل ہندوستانی کپتان روہت شرما نے لگاتار دوسرے میچ میں ٹاس جیت کر پہلے گیند بازی کا فیصلہ کیا۔ نیوزی لینڈ نے تیز شروعات کی اور چھ اوورکے پاور پلے میں 64 رن بنائے۔ لیکن اس کے بعد ہندوستان کے دونوں اسپنرزآف اسپنر روی چندرن اشون اور لیفٹ ارم اسپنر اکشر پٹیل نے درمیانی اوور میں اچھی گیند بازی کرکے بلے بازوں پر روک لگائی ۔ پٹیل نے چار اوور میں 26 رن دیے اور مارک چیپ مین کی وکٹ حاصل کی ۔ چیپ مین نے 17 گیندوں میں تین چوکوں کی مدد سے 21 رن بنائے۔

ہندوستان نے اس میچ میں آئی پی ایل میں سب سے زیادہ وکٹیں لینے والے بلے باز ہرشل پٹیل کو اپنا بین الاقوامی ڈیبیو کرنے کے لیے موقع دیا ۔ پٹیل نے عمدہ گیند بازی کرتے ہوئے ڈیرل مچل اور گلین فلپس کی وکٹیں لیں ۔ پٹیل نے چار اوور میں 25 رن دے کر دو وکٹ لیے۔ مچل نے 28 گیندوں پر تین چوکوں کی مدد سے 31 اور فلپس نے 21 گیندوں میں ایک چوکے اور تین چھکوں کی مدد سے 34 رن بنائے۔


سلامی بلے باز مارٹن گپٹل 15 گیندوں میں دو چوکوں اور تین چھکوں کی مدد سے 31 رن بنا کر دیپک چاہر کا شکار بنے ۔ اشون نے ٹم سیفرٹ کو اپنا شکار بنایا ۔ سیفرٹ نے 15 گیندوں میں 13 رن بنائے۔ جیمز نیشام 12 گیندوں میں تین رن بنا کر وبھونیشور کی گیند پر وکٹ کیپر رشبھ پنت کے ہاتھوں کیچ آؤٹ ہوئے ۔ میدان میں شام سے ہی اوس آ جانے کی وجہ سے گیند بازوں کو اپنی لائن لینتھ درست رکھنے میں مشکل پیش آرہی تھی لیکن تعریف کرنی ہو گی ہندوستانی گیند بازوں کی جنہوں نے زیادہ رن نہیں دیے۔ مچل سینٹنر آٹھ اور ایڈم ملنے پانچ رن بنا کر ناٹ آؤٹ رہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔