ہندوستان نے سنسنی خیز مقابلے میں زمبابوے کو 13 رنز سے شکست دی

ہرارے: شبھمن گل (103) کی سنچری کی بدولت ہندوستان نے پیر کو تیسرے ون ڈے میں زمبابوے کو 13 رن سے شکست دے دی۔ ہندوستان نے مقررہ 50 اوور میں آٹھ وکٹوں کے نقصان پر 289 رن بنائے تھے جس کے جواب میں زمبابوے کی ٹیم 276 رن بنا کر آل آؤٹ ہو گئی۔ سکندر رضا نے 115 رن کی سنچری اننگز کھیلتے ہوئے زمبابوے کو فتح کے نزدیک پہنچایا، لیکن وہ جیت نہ دلا سکے اور ان کی ٹیم ہندوستان کے خلاف 12 سال بعد پہلی جیت درج کرنے سے محروم رہی۔

ٹاس جیت کر بلے بازی کرتے ہوئے ہندوستان نے زمبابوے کو 290 رن کا ہدف دیا تھا۔ کپتان کے ایل راہل اور شیکھر دھون نے ٹیم کو مضبوط شروعات دلاتے ہوئے پہلی وکٹ کے لیے 63 رن جوڑے۔ جہاں راہل نے 46 گیندوں پر ایک چوکے اور ایک چھکے کی مدد سے 30 رن بنائے، وہیں دھون نے 68 گیندوں پر پانچ چوکوں کی مدد سے 40 رن بنائے۔

پہلی اننگز میں ہندوستانی ٹیم کے اسٹار شبھمن گل تھے جنہوں نے 97 گیندوں پر 15 چوکوں اور ایک چھکے کی مدد سے 130 رن کی سنچری اننگز کھیلی۔ اس کے علاوہ ایشان کشن نے 61 گیندوں میں چھ چوکوں کی مدد سے 50 رن بنائے۔ کشن نے بدقسمت انداز میں رن آؤٹ ہونے سے قبل گل کے ساتھ تیسری وکٹ کے لیے 140 رن شراکت کی۔

ہندوستان نے 42 اوور میں 224 رن بنائے تھے لیکن کشن کی وکٹ گرنے کے بعد زمبابوے نے میچ میں واپسی کی اور باقاعدہ وکٹیں لے کر ہندتان کو 289 رن تک محدود کردیا۔ دیپک ہڈا (01)، اکشر پٹیل (01) اور شاردول ٹھاکر (09) 10 رن کا نمبر چھوئے بغیر پویلین چلے گئے۔

ہندوستان نے 50 ویں اوور میں گل کا وکٹ گنواتے ہوئے سات رن جوڑے اور اننگز کا خاتمہ 289 پر کیا۔ زمبابوے کی جانب سے بریڈ ایوانز نے 10 اوور میں 54 رن دے کر پانچ وکٹیں حاصل کیں جب کہ وکٹر نیوچی اور لیوک جونگوے نے ایک ایک وکٹ حاصل کیا۔

جب زمبابوے کی ٹیم 290 رن کے ہدف کا تعاقب کرنے میدان میں اتری تو تیسرے اوور میں اوپنر انوسینٹ کائیا (06) آؤٹ ہوگئے جب کہ ان کے ساتھی کھلاڑی تکودزواناشے کائتانو کو پٹھوں میں کھچاؤ کے باعث پویلین جانا پڑا۔ سین ولیمز (45) نے ٹونی منیونگا (15) کے ساتھ اننگز کو آگے بڑھانے کی کوشش کی لیکن دونوں 16ویں اور 17ویں اوور میں پویلین واپس چلے گئے۔

اس کے بعد رضا نے زمبابوے کی اننگز کو ایک اینڈ سے آگے بڑھایا جبکہ دوسرے اینڈ سے بلے باز آؤٹ ہوتے رہے۔ ساتویں وکٹ کے طورپر لیوک جونگ وے کے 169 رن پر آؤٹ ہونے کے بعد بریڈ ایوانس کریز پر آئے جنہوں نے رضا کے ساتھ آٹھویں وکٹ کے لیے 104 رن کی شراکت داری کی۔ ایوانس نے 36 گیندوں پر دو چوکوں کی مدد سے قیمتی 28 رن بنائے اور ان کے آؤٹ ہونے تک زمبابوے کو 12 گیندوں پر صرف 17 رن کی ضرورت تھی۔

زمبابوے کی امیدیں رضا پر جمی ہوئی تھیں لیکن شاردول ٹھاکر نے انہیں 49ویں اوور میں شبھمن گل کے شاندار کیچ کی بدولت آؤٹ کر دیا اور ہندوستانی کیمپ نے راحت کی سانس لی۔ آویش خان نے 50ویں اوور میں وکٹر نیوچی کو آؤٹ کر کے میچ ختم کیا۔اس جیت کے ساتھ ہی ہندوستان نے زمبابوے کو تین میچوں کی سیریز میں 3-0 سے کلین سویپ کیا۔