ونڈے سیریز کے پہلے میچ میں ہندوستان کی شاندار گیندبازی، جنوبی افریقہ 116 رنوں پر ڈھیر

جوہانسبرگ: ہندوستان اور جنوبی افریقہ کے درمیان ٹی ٹوئنٹی سیریز 1-1 سے برابر رہی اور اب دونوں ٹیموں کے درمیان تین ون ڈے میچوں کی سیریز ہو رہی ہے جس کا پہلا میچ آج نیو وانڈررز اسٹیڈیم جوہانسبرگ میں کھیلا جا رہا ہے۔ جنوبی افریقہ نے ٹیم انڈیا کو جیت کے لیے 117 رن کا ہدف دیا ہے۔

ٹاس جیت کر پہلے بلے بازی کرنے کا فیصلہ کرنے کے بعد جنوبی افریقہ کا آغاز انتہائی خراب رہا اور پاور پلے میں ہی اس کی چار وکٹیں گر گئیں۔ یہ چار وکٹیں ارشدیپ سنگھ نے حاصل کیں۔ ارشدیپ سنگھ نے اپنے پہلے ہی اوور میں ریزا ہینڈرکس اور رسی وین ڈیر ڈوسن کو کھاتہ کھولے بغیر پویلین واپس بھیج دیا۔ بعد میں ارشدیپ نے دوسرے اوپنرز ٹونی ڈی زارزی اور ہینرک کلاسن کو آؤٹ کیا۔

ارشدیپ سنگھ کے بعد اویش خان کا جادو نظر آیا اور انہوں نے کپتان ایڈن مارکرم اور ویان مولڈر کو لگاتار گیندوں پر آؤٹ کر کے افریقی ٹیم کی حالت خراب کر دی۔ اس کے بعد اویش نے خطرناک بلے باز ڈیوڈ ملر اور کیشو مہاراج کو بھی پویلین بھیج دیا۔ 73 رنز پر سات وکٹیں گرنے کے بعد ایسا لگ رہا تھا کہ جنوبی افریقہ 100 رنز بھی نہیں بنا پائے گا لیکن اینڈائل پھہلوکوائیو نے کچھ بڑے شاٹس مار کر جنوبی افریقہ کو 116 رنز تک پہنچایا۔

قبل ازیں، جنوبی افریقہ کے کپتان ایڈن مارکرم نے ٹاس جیت کر بلے بازی کرنے کا فیصلہ کیا۔ مارکرم نے کہا ہے کہ یہ وکٹ پہلے بھی استعمال ہو چکی ہے یہاں اسپنرز کے لیے بہت مدد ہے اور ہم دوسری اننگ میں اس سے زیادہ فائدہ اٹھا سکتے ہیں۔

ہندوستانی کپتان کے ایل راہل نے کہا کہ ہم بھی اگر ٹاس جیتتے تو بلے بازی ہی کرتے۔ پچھلے چند میچز دیکھنے کے بعد ہم سمجھ گئے ہیں کہ یہ پچ اسپنرز کے لیے بہت مددگار ہے۔ آج سائی سدرشن ہماری ٹیم میں ڈیبیو کر رہے ہیں۔ وہ ایک شاندار کھلاڑی ہیں۔ کلدیپ اور اکشر ہماری ٹیم میں بطور اسپنر ہیں۔