آئی سی سی نے منتخب کی ٹی-20 کی بہترین ٹیم، مرد و خاتون دونوں زمرے میں ہندوستان نے ماری بازی

انٹرنیشنل کرکٹ کونسل (آئی سی سی) نے 2022 میں ٹی-20 کرکٹ کھیلنے والے کھلاڑیوں کی کارکردگی کو پیش نظر رکھتے ہوئے سال کی بہترین ٹیم کا اعلان کر دیا ہے۔ آئی سی سی نے مرد و خاتون زمرے میں جن 11-11 کھلاڑیوں کا انتخاب کیا ہے، اس میں ہندوستانی کھلاڑی بازی مرتے ہوئے دکھائی دے رہے ہیں۔ مردوں کی ٹیم میں جہاں سب سے زیادہ 3 ہندوستانی کھلاڑیوں کو شامل کیا گیا ہے، وہیں خواتین کی ٹیم میں 4 ہندوستانی کھلاڑیوں نے اپنی جگہ بنائی ہے۔

اگر ٹی-20 کرکٹ میں ’آئی سی سی ٹیم آف دی ایئر‘ (مرد) کی بات کی جائے تو ہندوستان کے تین کھلاڑیوں وراٹ کوہلی، سوریہ کمار یادو اور ہاردک پانڈیا کو جگہ دی گئی ہے۔ دیگر ممالک کی بات کی جائے تو پاکستان و انگلینڈ کے 2-2 کھلاڑی اور سری لنکا، نیوزی لینڈ، زمبابوے و آئرلینڈ کے 1-1 کھلاڑی ٹی-20 کی بیسٹ ٹیم میں جگہ بنا پائے ہیں۔

اسی طرح خواتین کی ’آئی سی سی ٹیم آف دی ایئر‘ (ٹی-20 کرکٹ) میں ہندوستان کی 4 کھلاڑیوں اسمرتی مندھانا، دیپتی شرما، رِشا گھوش اور رینوکا سنگھ نے جگہ بنانے میں کامیابی حاصل کی ہے۔ دوسرے نمبر پر آسٹریلیا ہے جس کی 3 کھلاڑیوں کو آئی سی سی نے بیسٹ ٹی-20 ٹیم میں جگہ دی ہے۔ ان دونوں ممالک کے علاوہ نیوزی لینڈ، پاکستان، انگلینڈ اور سری لنکا سے 1-1 کھلاڑی کو ٹیم میں جگہ ملی ہے۔

آئی سی سی بیسٹ ٹی-20 ٹیم 2022 (مرد):

جوس بٹلر (کپتان اور وکٹ کیپر، انگلینڈ)، محمد رضوان (پاکستان، وراٹ کوہلی (ہندوستان)، سوریہ کمار یادو (ہندوستان)، گلین فلپس (نیوزی لینڈ)، سکندر رضا (زمبابوے)، ہاردک پانڈیا (ہندوستان)، سیم کرن (انگلینڈ)، وانندو ہسرنگا (سری لنکا)، حارث رؤف (پاکستان)، جوش لٹل (آئرلینڈ)۔

آئی سی سی بیسٹ ٹی-20 ٹیم 2022 (خاتون):

اسمرتی مندھانا (ہندوستان)، ویتھ مونی (آسٹریلیا)، سوفی ڈیوائن (کپتان، نیوزی لینڈ)، ایشلے گارڈنر (آسٹریلیا)، تاہلیا میک گرا (آسٹریلیا)، ندا ڈار (پاکستان)، دیپتی شرما (ہندوستان)، رشا گھوش (وکٹ کیپر، ہندوستان)، سافی ایکسلٹون (انگلینڈ)، اینوکا رنویرا (سری لنکا)، رینوکا سنگھ (ہندوستان)۔