روہت ’ون ڈے کرکٹر آف دی ایئر‘ اور وراٹ ’اسپرٹ آف کرکٹ ایوارڈ‘ کے لئے منتخب

روہت شرما نے گزشتہ سال کل سات سنچریوں سمیت کیلنڈر سال میں سب سے زیادہ 1490 رنز بنائے تھے۔ سلامی بلے باز نے 28 ون ڈے مقابلوں میں 57.30 کے اوسط سے یہ کامیابی حاصل کی۔

تصویر سوشل میڈیا
تصویر سوشل میڈیا
user

یو این آئی

دبئی: ہندوستان کے نائب کپتان روہت شرما کو سال 2019 میں ون ڈے کرکٹ میں ان کی شاندار کارکردگی کے لئے آئی سی سی ایوارڈ میں ون ڈے کرکٹر آف دی ایئر منتخب کیا گیا ہے جبکہ ہندوستانی کپتان وراٹ کوہلی کو اسپرٹ آف کرکٹ ایوارڈ اور ہندوستانی تیز گیندباز دیپک چاهر کو ٹی -20 میں بہترین گیندبازی کے لئے منتخب کیا گیا ہے۔

انگلینڈ کے آل راؤنڈر بین اسٹوکس کو آئی سی سی پلیئر آف دی ایئر منتخب کیا گیا ہے جس کے لئے انہیں سر گارفیلڈ سوبرس ٹرافی ملے گی۔ بین الاقوامی کرکٹ کونسل (آئی سی سی) نے آئی سی سی ایوارڈوں کا اعلان کر دیا ہے۔ آسٹریلیا کے تیز گیند باز پیٹ کمنز کو ٹیسٹ پلیئر آف دی ایئر منتخب کیا گیا ہے۔

32 سال کے روہت کو ون ڈے کرکٹر آف دی ایئر منتخب کیا گیا ہے۔ روہت نے انگلینڈ میں ورلڈ کپ -2019 کے دوران ریکارڈ پانچ سنچری مکمل کی تھی۔ انہوں نے گزشتہ سال کل سات سنچریوں سمیت کیلنڈر سال میں سب سے زیادہ 1490 رنز بنائے تھے۔ سلامی بلے باز نے 28 ون ڈے مقابلوں میں 57.30 کے اوسط سے یہ کامیابی حاصل کی۔ روہت نے ورلڈ کپ میں نو اننگز میں 81 کے اوسط سے 648 رن بنائے تھے۔

ہندوستانی کپتان اور عالمی نمبر ایک بلے باز وراٹ کو اسپرٹ آف کرکٹ ایوارڈ کے لئے منتخب کیا گیا ہے۔ وراٹ نے انگلینڈ میں ورلڈ کپ کے دوران مداحوں سے آسٹریلیا کے سابق کپتان اسٹیون اسمتھ کی هوٹگ نہ کرنے کی اپیل کی تھی۔ اسمتھ گیند سے چھیڑ چھاڑ کرنے کے الزام میں ایک سال کی پابندی کا سامنا کے بعد کرکٹ میں واپسی کر رہے تھے۔

وراٹ کوہلی نے مداحوں سے اسمتھ کی حوصلہ افزائی کی اپیل کی تھی۔ دراصل میچ میں وراٹ بلے بازی کر رہے تھے۔ اس وقت اسمتھ باؤنڈری کے قریب فیلڈنگ کر کر رہے تھے۔ وہاں موجود شائقین نے اسمتھ کو چڑھانا شروع کر دیا تھا اور پھر وراٹ نے ناظرین کو ایسا کرنے سے روکا تھا۔

وراٹ کو اس کے علاوہ سال کی آئی سی سی ٹیسٹ اور ون ڈے ٹیموں کا کپتان بھی منتخب کیا گیا ہے۔ یہ مسلسل تیسرا سال ہے جب وراٹ کو آئی سی سی کی ٹیسٹ اور ون ڈے ٹیموں کا کپتان منتخب کیا گیا ہے۔ وراٹ نے 2018 اور 2019 میں بھی یہ کامیابی حاصل کی تھی۔

تیز گیند باز دیپک چاهر کو بہترین ٹی -20 گیندبازی کے لئے منتخب کیا گیا ہے۔ چاهر نے گزشتہ سال نومبر میں بنگلہ دیش کے خلاف 7 رنز دے کر 6 وکٹ لئے تھے اور مردوں کے ٹی -20 انٹرنیشنل میچ میں سب سے زیادہ وکٹ لینے کا ریکارڈ قائم کیا تھا۔ چاهر کے اسپیل کو آئی سی سی نے ٹی -20 انٹرنیشنل پرفامنس آف دی ایئر قرار دیا ہے۔

انگلینڈ کے اسٹار آل راؤنڈر اسٹوکس کو آئی سی سی ایوارڈ کے سب سے بڑے ایوارڈ پلیئر آف دی ایئر کے لئے منتخب کیا گیا ہے اور اس کے لیے انہیں سر گارفیلڈ سوبرس ٹرافی سے نوازا جائے گا۔ اسٹوکس کے دم پر انگلینڈ نے پہلی بار ورلڈ کپ جیتا۔ 28 سال کے اسٹوکس نے ایشز کے دوران لیڈز ٹیسٹ میں ناٹ آوٹ 135 رنز کی زبردست اننگز کھیلی تھی اور انگلینڈ کو آسٹریلیا کے خلاف ایک وکٹ سے جیت دلائی تھی۔

اسٹوکس نے ورلڈ کپ فائنل میں نیوزی لینڈ کے خلاف فائنل میں 98 گیندوں پر ناٹ آوٹ 84 رن بنائے تھے اور پھر سپر اوور میں تین گیندوں پر آٹھ رن بنائے تھے۔ میچ اور سپر اوور ٹائی رہے تھے اور انگلینڈ نے باونڈری کاؤنٹ پر ورلڈ کپ جیتا تھا۔

next