ہینڈ شیک تنازعہ: پاکستان کو آئی سی سی سے جھٹکا، میچ ریفری اینڈی پائیکرافٹ کو ہٹانے کا مطالبہ خارج

بین الاقوامی کرکٹ کونسل (آئی سی سی) نے ایشیا کپ سے میچ ریفری اینڈی پائیکرافٹ کو ہٹانے کا پاکستان کا مطالبہ خارج کر دیا ہے۔ یہ فیصلہ ہند-پاک میچ کے بعد پیش آئے ’ہینڈ شیک‘ تنازعہ کے سلسلے میں آیا ہے۔ ذرائع کے مطابق آئی سی سی نے معاملے کی جانچ کرنے کے بعد اپنا فیصلہ پاکستان کرکٹ بورڈ کو بتا دیا ہے۔

ذرائع کے مطابق ایشین کرکٹ کونسل (اے سی سی) کے کچھ افسر، جن میں پی سی بی کے ڈائرکٹر بھی شامل تھے، کو پہلے سے پتہ تھا کہ دونوں کپتان میچ کے بعد ہینڈ شیک نہیں کریں گے، لیکن اس کے باوجود دونوں کپتانوں میں ’ہینڈ شیک‘ نہیں ہونے پر پاکستان کرکٹ بورڈ نے ناراضگی کا اظہار کیا۔ ذرائع کے مطابق پی سی بی نے دھمکی دی تھی کہ اگر میچ ریفری کو باقی میچوں سے نہیں ہٹایا گیا تو پاکستانی ٹیم ٹورنامنٹ سے واپس ہو جائے گی۔ اب یہ دیکھنا دلچسپ ہوگا کہ آئی سی سی کے فیصلہ کے بعد پاکستان کرکٹ بورڈ کیا رخ اپناتا ہے۔

پی سی بی نے آئی سی سی کو لکھے اپنے ایک خط میں کہا تھا کہ پائیکرافٹ نے پاکستانی کپتان سلمان آغا کو سوریہ کمار یادو سے ہاتھ نہ ملانے کا مشورہ دیا تھا۔ بورڈ نے کہا کہ اپوزیشن ٹیم سے ہاتھ ملانے سے انکار کرکے ہندوستانی کھلاڑی ضابطہ اخلاق کی خلاف ورزی کر رہے ہیں۔ رپورٹس کے مطابق آئی سی سی نے پائیکرافٹ کے کردار کو مشتبہ نہیں پایا اور پتہ چلا کہ اے سی سی کو پہلے سے اس کی جانکاری تھی۔ اس طرح آئی سی سی نے پی سی بی کا مطالبہ خارج کر دیا۔

اس پورے تنازعہ سے بوکھلائے پاکستان کرکٹ بورڈ نے اپنے افسر پر ہی بجلی گرا دی۔ ہندوستان سے شکست کے بعد پی سی بی نے اپنے انٹرنیشنل کرکٹ آپریشنس کے ڈائرکٹر عثمنا وہلا کو معطل کر دیا۔ پاکستانی میڈیا رپورٹس کے مطابق محسن نقوی کی قیادت والے بورڈ نے عثمان وہلا کے خلاف یہ تادیبی کارروائی اس لیے کی کیونکہ وہ ’ہینڈ شیک‘ تنازعہ پر وقت رہتے قدم نہیں اٹھا پائے۔

واضح رہے کہ 69 سالہ زمبابوے کے اینڈی پائیکرافٹ کو بدھ کو متحدہ عرب امارات کے خلاف پاکستان کے آخری گروپ مرحلے کے مقابلے میں میچ ریفری کا کردار ادا کرنا ہے۔