’افسوس ہوتا ہے کہ میں نے کرکٹ کھیلا‘، حیدر آباد کرکٹ ایسوسی ایشن کے عمل سے سابق ہندوستانی کپتان محمد اظہر الدین شدید ناراض

سابق ہندوستانی کرکٹر اور کپتان محمد اظہر الدین کا نام حیدرآباد کے راجیو گاندھی اسٹیڈیم سے ہٹا دیا گیا ہے۔ حیدرآباد کرکٹ ایسوسی ایشن کے اس قدم کو اظہر الدین نے شرمناک قرار دیتے ہوئے بی سی سی آئی سے کارروائی کا مطالبہ کیا ہے۔ حیدرآباد کرکٹ ایسوسی ایشن کے اس عمل سے اظہر الدین کافی ناراض ہیں۔ انہوں نے یہاں تک کہہ دیا کہ افسوس ہوتا ہے کہ میں نے کرکٹ کھیلا۔ ساتھ ہی اظہر الدین نے حیدرآباد کرکٹ ایسوسی ایشن کے خلاف قانونی کارروائی کی وارننگ بھی دی ہے۔

اظہر الدین نے ’گلف نیوز‘ سے بات کرتے ہوئے کہا کہ ان کا دل ٹوٹ گیا ہے۔ کبھی کبھی مجھے افسوس ہوتا ہے کہ میں نے کرکٹ کھیلا۔ آج ایسے لوگ کھیل سے متعلق فیصلے لے رہے ہیں جنہیں کرکٹ کی بنیادی سمجھ تک نہیں ہے، یہ کھیل کی توہین ہے۔ اظہر الدین نے اس حوالے سے مزید کہا کہ میں اس ناانصافی کے خلاف قانونی کارروائی کروں گا اور بی سی سی آئی سے اپیل کروں گا کہ وہ اس معاملہ کو دیکھیں اور مناسب کارروائی کریں۔ ویسے یہ کوئی نیا معاملہ نہیں ہے۔ سن رائزرس حیدرآباد کے ساتھ بھی پاس کو لے کر تنازعہ ہوا تھا، جس سے ظاہر ہوتا ہے کہ اس ایسوسی ایشن کے مینجمنٹ میں کافی کمی ہے جس کی وجہ سے اس طرح کے حالات پیدا ہو رہے ہیں۔

حیدرآباد کرکٹ ایسوسی ایشن کے نارتھ پویلین اسٹینڈ سے محمد اظہر الدین کا نام ہٹانے کا حکم ایچ سی اے کے ایتھکس آفیسر اور لوک پال جسٹس وی ایشوریا نے دیا۔ یہ حکم ہفتہ (19 اپریل) کو اس عرضی کے بعد دیا گیا جس میں اظہر الدین کے خلاف تعصب کے سنگین الزامات عائد کیے گئے تھے۔ ’کرکبز‘ کی ایک رپورٹ کے مطابق یہ کارروائی لارڈس کرکٹ کلب کی شکایت کے بعد کی گئی ہے۔ اس عرضی میں الزام عائد کیا گیا تھا کہ بطور ایچ سی اے صدر اظہر الدین نے اپنے عہدے کا غلط استعمال کیا اور ان کے فیصلے ان کے ذاتی فائدے کے لیے تھے۔

قابل ذکر ہے کہ محمد اظہر الدین نے ہندوستان کے لیے 99 ٹیسٹ میچوں میں 22 سنچریوں کی مدد سے 6215 رن بنائے ہیں۔ اس کے علاوہ انہوں نے 334 یک روزہ میچوں میں 36 سے زیادہ کی اوسط سے 9378 رن بنائے ہیں، جن میں 7 سنچریاں بھی شامل ہیں۔ اگر اظہر الدین کے فرسٹ کلاس کیریئر کی بات کی جائے تو ان کے نام 54 سنچریاں ہیں جب کہ لسٹ اے میں انہوں نے 11 سنچریاں اسکور کیں۔