انگلینڈ نے لارڈ ز میں ہندوستان سے تیسرا ون ڈے جیتا، سیریز بھی جیتی

لارڈز میں کھیلے گئے تیسرے ون ڈے میں انگلینڈ نے 27 رنز سے کامیابی حاصل کی۔ میزبان انگلینڈ نے بین ڈکٹ (141 رنز) کی تاریخی اننگز کی بدولت 387 رنز کا بڑا ہدف دیا تھا۔ جواب میں ٹیم انڈیا مقررہ اوورز میں صرف 360 رنز بنا کر تاریخ رقم کرنے میں ناکام رہی۔ ہندوستان کی جانب سے روہت شرما نے 138 اور ویراٹ کوہلی نے 74 رنز بنائے لیکن دونوں ہی  صرف شکست کا فرق کم کر سکے۔ تاہم ایک موقع پر 388 رنز کے ہدف کا تعاقب کرتے ہوئے ٹیم انڈیا انگلینڈ سے آگے تھی۔ ایسا لگ رہا تھا کہ ہندوستانی کرکٹ میں آج تاریخ بدل جائے گی لیکن انگلینڈ نے آخری اوورز میں میچ جیت لیا۔ اس فتح کے ساتھ ہی انگلینڈ نے تین میچوں کی سیریز بھی اپنے نام کی۔

388 کے ریکارڈ اسکورکا تعاقب کرتے ہوئے ٹیم انڈیا نے کپتان شبھمن گل اور 'ہٹ مین' روہت شرما کی بدولت شاندار شروعات کی۔ انہوں نے 24.2 اوورز میں پہلی وکٹ کے لیے 147 رنز جوڑے۔ کپتان گل 84 گیندوں پر 10 چوکے اور ایک چھکا لگا کر 77 رنز بنا کر آؤٹ ہوئے۔

اس کے بعد روہت نے ویراٹ کوہلی کے ساتھ سنچری کی شراکت داری کی۔ اس تاریخی میچ میں انہوں نے اپنے 21ویں اوور پر سنچری شراکت داری کی۔ ہندوستان  کی دوسری وکٹ 260 کے اسکور پر 39ویں اوور میں گری۔روہت شرما 110 گیندوں پر 138 رنز بنا کر آؤٹ ہوئے، انہوں نے 17 چوکے اور پانچ چھکے لگائے۔ لارڈز میں کسی ہندوستانی کی یہ پہلی سنچری تھی۔

روہت کے آؤٹ ہونے کے بعد ہندوستان کی امیدیں ایک بار پھر دم توڑ گئیں لیکن ویراٹ کوہلی ابھی بھی کریز پر موجود تھے۔ انہوں نے وقت کے ساتھ گیئرز بدلے، لیکن ایشان کشن کے 12 گیندوں پر 14 اور شریاس ایئر کے صفر رنز پر آؤٹ ہونے نے ان پر بہت زیادہ دباؤ ڈالا۔ ویراٹ 60 گیندوں پر 74 رنز بنا کر آؤٹ ہو گئے، جس سے ہندوستان کی باقی امیدیں ختم ہو گئیں۔ کے ایل راہل نے آٹھ گیندوں پر 12 رنز بنائے، اور اکشر پٹیل تین گیندوں پر صرف دو رنز بنانے میں کامیاب رہے۔ گرنور برار نے 14 گیندوں پر 18 اور ارشدیپ سنگھ چھ گیندوں پر 15 رنز بنا کر ناٹ آؤٹ رہے۔ برار نے ایک چوکا اور ایک چھکا لگایا جبکہ ارشدیپ نے تین چوکے لگائے۔

انگلینڈ کے کپتان ہیری بروک نے اپنی قیادت میں کافی مہارت دکھائی۔ انہوں نے باؤلنگ میں نمایاں تبدیلیاں کیں۔ جیکب بیتھل کا سات اوور کرانا انگلینڈ کی جیت میں کلیدی عنصر ثابت ہوا، کیونکہ ہندوستانی بلے باز باقی تمام گیند بازوں پر حاوی تھے۔ مزید برآں انگلینڈ کی شاندار فیلڈنگ نے بھی ہندوستان کی شکست میں اہم کردار ادا کیا۔ اس سے قبل انگلینڈ کی بیٹنگ کی قیادت بین ڈکٹ کے 141، جیکب بیتھل کے 91 اور جو روٹ کے ناقابل شکست 74 رنز کی بدولت تھی۔روٹ تین میچوں کی سیریز کے دوران ناقابل شکست رہے ۔ آخر میں جوس بٹلر نے 13 گیندوں پر 41 رنز بنا کر انگلینڈ کا سکور 400 کے قریب پہنچا دیا۔