دہلی کیپٹلس نے ممبئی انڈینس کو دو وکٹوں سے ہرایا

شیفالی ورما (43) کے طوفانی انداز کے بعد نکی پرساد (35) کی شاندار اننگ کی بدولت دہلی کیپٹلس نے ہفتہ کو ویمنس پریمیئر لیگ (ڈبلیو پی ایل) کے ایک میچ میں ممبئی انڈینس کے خلاف دو وکٹوں سے سنسنی خیز جیت درج کی۔

ممبئی انڈینز نے پہلے بیٹنگ کرتے ہوئے 164 رنز بنائے جس کے جواب میں دہلی کیپٹلز نے اننگ کی آخری گیند پر دوکٹ باقی رہتے 165 رنز کا ہدف حاصل کرلیا۔ دہلی کی جیت میں شیفالی اور نکی کے علاوہ سارہ برائس (21) اور رادھا یادو (9) نے بھی اہم کردار ادا کیا جنہوں نے آخری گیند تک جدوجہد کی اور ممبئی کے جبڑے سے جیت چھین لی۔ شفالی نے اپنے بے خوف انداز میں اننگ کا آغاز کیا اور پاور پلے کا بھرپور فائدہ اٹھاتے ہوئے میدان کے چاروں طرف چوکوں اور چھکوں کی بوچھار کردی۔ انہوں نے اپنی 18 گیندوں کی مختصر اننگ میں 233 کے اسٹرائیک سے ریٹ بنایا لیکن ان کے آؤٹ ہونے کے بعد ان کی ساتھی میگ لیننگ (15) بھی آؤٹ ہوگئیں۔

وکٹیں گرنے کے باوجود دہلی کے بلے بازوں نے اپنے جارحانہ انداز میں کمی نہیں آنے دی، جس کے نتیجے میں مخالف گیند باز رن ریٹ کو روکنے میں ناکام رہے۔ آخری اوور باقاعدہ تیز گیندباز شائیکا اسحاق کی جگہ سجیون سنجنا کو دیا گیا، جنہوں نے ایک وکٹ لے کر ممبئی کی امیدیں بڑھا دیں، لیکن نئی بلے باز اروندھتی ریڈی نے آخری گیند پر دو رن چرا کر میچ کو اپنی ٹیم کے حق میں کر دیا۔

اس سے قبل ٹاس ہار کر پہلے بلے بازی کرنے اتری ممبئی کو ہیلی میتھیوز (0) کی صورت میں پہلا دھچکا پہلے ہی اوور میں لگ گیا تھا، تاہم میتھیوز کی جگہ بلے بازی کرنے اتری برنٹ نے ایک سرے پر رک کر اپنے جارحانہ انداز سے مخالف گیند بازوں کے حوصلے پست کرنا شروع کیا۔ اس دوران دہلی کو ایک اور کامیابی یستیکا بھاٹیہ (11) کی شکل میں ملی جنہیں شیکھا پانڈے نے اپنا دوسرا شکار بنایا۔

دوسری جانب کپتان ہرمن پریت نے کریز پر آتے ہی مخالف گیند بازوں کی پٹائی شروع کردی۔ برنٹ اور ہرمن پریت نے اگلے چھ اووروں میں 12 کے اسٹرائیک ریٹ سے 73 رنز بنائے۔ ہرمن پریت کو اینابیل سدرلینڈ نے آؤٹ کیا، حالانکہ آؤٹ ہونے سے پہلے وہ 22 گیندوں میں چار چوکے اور تین چھکے لگاچکی تھیں۔

ہرمن کے آؤٹ ہونے کے بعد دہلی کیپٹلز نے ممبئی کے رنوں کی رفتار پر نہ صرف بریک لگایا بلکہ وقفے وقفے سے وکٹیں بھی حاصل کیں۔ دوسرے سرے پر، برنٹ نے گیند کو باؤنڈری لائن کے پار بھیجنا جاری رکھا، جس سے ممبئی ایک شاندار اسکور کھڑا کرنے میں کامیاب ہوسکی۔ دہلی کے لیے سدرلینڈ 34 رن پر تین وکٹ لے کر سب سے کامیاب گیندباز رہیں، جب کہ شکھا پانڈے نے دو اور ایلس کیپسی اور منو منی نے ایک ایک وکٹ لیا۔