کرکٹ عالمی کپ: انعامی رقم کا اعلان، فاتح ٹیم کو ملیں گے 33 کروڑ روپے، دیکھیے پوری فہرست

آئندہ ماہ شروع ہونے والے کرکٹ کے ’مہاکمبھ‘ یعنی عالمی کپ کو لے کر انٹرنیشنل کرکٹ کونسل (آئی سی سی) نے آج ایک بڑا اعلان کیا۔ آئی سی سی ٹورنامنٹ سے متعلق انعامی رقم کا اعلان کر دیا ہے۔ عالمی کپ کے لیے پرائز منی کا بجٹ 10 ملین امریکی ڈالر (تقریباً 83 کروڑ روپے) مختص کیا گیا ہے۔ آئی سی سی نے 22 ستمبر کو جانکاری دی ہے کہ عالمی کپ فائنل میں جیتنے والی ٹیم کو 4 ملین ڈالر (تقریباً 33.17 کروڑ روپے) اور ہارنے والی ٹیم کو 2 ملین ڈالر (تقریباً 16.59 کروڑ روپے) دیے جائیں گے۔ آئی سی سی کے ذریعہ دی گئی انعامی رقم کی مکمل تفصیل اس طرح ہے:

عالمی کپ فاتح– 4 ملین امریکی ڈالر (تقریباً 33.17 کروڑ روپے)

عالمی کپ نائب فاتح– 2 ملین امریکی ڈالر (تقریباً 16.59 کروڑ روپے)

سیمی فائنل میں ہارنے والی ٹیم– 8 لاکھ امریکی ڈالر (تقریباً 6.63 کروڑ روپے)

گروپ راؤنڈ میں باہر ہونے پر– 1 لاکھ امریکی ڈالر (تقریباً 82.29 لاکھ روپے)

گروپ راؤنڈ میں ہر میچ جیتنے پر– 40 ہزار امریکی ڈالر (تقریباً 33.17 لاکھ روپے)

واضح رہے کہ عالمی کپ کی میزبانی ہندوستان کے پاس ہے۔ 5 اکتوبر کو گزشتہ عالمی چمپئن انگلینڈ اور نیوزی لینڈ کے درمیان پہلا مقابلہ کھیلا جائے گا۔ ٹورنامنٹ کا فائنل 19 نومبر کو ہوگا۔ افتتاحی اور اختتامی دونوں مقابلے احمد آباد کے نریندر مودی اسٹیڈیم میں منعقد ہوں گے۔ گروپ مرحلہ میں سبھی 10 ٹیمیں راؤنڈ-رابن فارمیٹ میں ایک دوسرے سے کھیلیں گی۔ پائنٹس ٹیبل میں سرفہرست 4 میں رہنے والی ٹیمیں سیمی فائنل میں پہنچیں گی۔ 2019 میں بھی اسی فارمیٹ میں ٹورنامنٹ کھیلا گیا تھا۔

عالمی کپ کے 13ویں ایڈیشن میں میزبان ہندوستان کے علاوہ نیوزی لینڈ، انگلینڈ، بنگلہ دیش، پاکستان، آسٹریلیا، افغانستان، جنوبی افریقہ، سری لنکا اور نیدرلینڈ کی ٹیمیں کھیلیں گی۔ 10 ٹیموں کے درمیان مجموعی طور پر 48 مقابلے کھیلے جائیں گے۔ عالمی کپ کی شروعات سے قبل سبھی ٹیمیں 46 دنوں تک چلنے والے ٹورنامنٹ کے لیے تیار ہونے کے لیے 2-2 پریکٹس میچ کھیلیں گی۔