کرکٹ: عالمی ٹیسٹ چمپئن شپ فائنل کے لیے شرائط و ضوابط جاری، جانیے تفصیل

آئی سی سی کا کہنا ہے کہ گریڈ 1 ڈیوکس کرکٹ بال سے کھیلے جانے والے فائنل میچ کے دوران اگر بارش یا کسی دیگر وجہ سے وقت برباد ہوتا ہے تو اس کے ازالہ کے لیے مقابلے کو 23 جون تک بڑھایا جا سکتا ہے۔

عالمی ٹیسٹ چمپئن شپ کا فائنل 18 جون سے
عالمی ٹیسٹ چمپئن شپ کا فائنل 18 جون سے
user

تنویر

عالمی ٹیسٹ چمپئن شپ کا فائنل میچ ہندوستان اور نیوزی لینڈ کے مابین 18 جون سے شروع ہونا ہے جو 22 جون تک چلے گا۔ اس میچ کا انتظار پوری دنیا کے کرکٹ شیدائیوں کو ہے، اور جمعہ کو آئی سی سی نے کھیل کے شرائط و ضوابط بھی جاری کر دیے۔ آئی سی سی کے مطابق میچ کے ڈرا یا ٹائی ہونے پر دونوں ہی ٹیموں کو فاتح قرار دیا جائے گا۔ گویا کہ اگر ہندوستان اور نیوزی لینڈ کی ٹیمیں میچ کا نتیجہ نکالنے میں ناکام ہوتی ہیں، تو انھیں پوائنٹ یا کسی دیگر بنیاد پر فاتح قرار نہیں دیا جائے گا، بلکہ پہلے عالمی ٹیسٹ چمپئن شپ فائنل کی فاتح دونوں ہی ٹیمیں مشترکہ طور پر ہوں گی۔

آئی سی سی کی جانب سے دی گئی جانکاری کے مطابق فائنل میچ کے لیے ایک ریزرو دن یعنی 23 جون کو خالی رکھا گیا ہے۔ لیکن اس دن کا استعمال میچ ڈرا ہونے کی صورت میں نہیں کیا جائے گا، بلکہ تب ہوگا جب پانچ دنوں کے دوران میچ کے بیچ میں کوئی خلل پیدا ہوا ہو اور مقررہ اوور سے کم ڈالے گئے ہوں۔ آئی سی سی کا کہنا ہے کہ گریڈ 1 ڈیوکس کرکٹ بال سے کھیلے جانے والے فائنل میچ کے دوران اگر بارش یا کسی دیگر وجہ سے وقت برباد ہوتا ہے تو اس کے ازالہ کے لیے مقابلے کو 23 جون تک بڑھایا جا سکتا ہے۔

آئی سی سی کا کہنا ہے کہ میچ کے دوران وقت خراب ہونے کی حالت میں آئی سی سی میچ ریفری باضابطہ طور سے ٹیموں اور میڈیا کو اس بارے میں اَپ ڈیٹ کریں گے کہ ریزرو ڈے کا استعمال کس طرح کیا جا سکتا ہے۔ ریزرو ڈے کا استعمال کرنے کی ضرورت پر آخری فیصلے کا اعلان پانچویں دن آخری گھنٹے کے شروع میں کیا جائے گا۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 28 May 2021, 6:11 PM