اینڈرسن-تندولکر ٹرافی: بمراہ کے شاندار پنجے سے انگلینڈ 465 پر آل آؤٹ، کپل دیو کے ریکارڈ کی برابری

لیڈز: جسپریت بمراہ کی شاندار گیندبازی کی بدولت ہندوستان نے اینڈرسن-تندولکر ٹرافی کے پہلے ٹیسٹ کے تیسرے دن انگلینڈ کو اس کی پہلی اننگز میں 465 رنز پر آل آؤٹ کر دیا۔ بمراہ نے 24.4 اوورز میں 83 رنز دے کر 5 وکٹیں حاصل کیں اور یوں بیرون ملک ایک اننگز میں سب سے زیادہ مرتبہ پانچ وکٹیں لینے کے معاملے میں کپل دیو کی برابری کر لی۔ دونوں کھلاڑیوں نے یہ کارنامہ 12 مرتبہ انجام دیا ہے۔

ہندوستان نے اپنی پہلی اننگز میں 471 رنز بنائے تھے، جس کے مقابلے میں انگلینڈ نے تیسرے دن کھیل کی شروعات تین وکٹ پر 209 رنز سے کی۔ لنچ تک انگلینڈ نے اپنا اسکور پانچ وکٹ پر 327 تک پہنچا لیا تھا لیکن دوسرے سیشن میں پوری ٹیم 465 رنز پر آل آؤٹ ہو گئی۔ نو وکٹ گرنے کے بعد چائے کا وقفہ مؤخر کیا گیا اور بمراہ نے آخری وکٹ حاصل کر کے انگلینڈ کی اننگز سمیٹ دی۔

انگلینڈ کے بلے باز ہیری بروک صرف ایک رن کی کمی سے سنچری مکمل نہ کر سکے اور 99 رنز پر آؤٹ ہو گئے۔ انہوں نے اپنی 112 گیندوں کی اننگز میں 11 چوکے اور دو چھکے لگائے۔ بروک کو پرسدھ کرشنا نے آؤٹ کیا، جنہوں نے اس سے پہلے شاندار فارم میں نظر آنے والے اولی پوپ کو بھی پویلین بھیجا، جنہوں نے 106 رنز بنائے۔

پرسدھ کرشنا نے مجموعی طور پر 20 اوورز میں 128 رنز دے کر تین وکٹیں حاصل کیں، جبکہ محمد سراج نے 27 اوورز میں 122 رنز دے کر دو کھلاڑیوں کو آؤٹ کیا۔

سراج نے انگلینڈ کے کپتان بین اسٹوکس کو محض 20 رنز پر وکٹ کے پیچھے کیچ آؤٹ کرایا۔ اسٹوکس کی مایوس کن کارکردگی پر انہوں نے غصے میں اپنا بلا ہوا میں اچھال دیا۔ سراج نے برائیڈن کارس کو بھی آؤٹ کیا، جبکہ بمراہ نے کرس ووکس (38 رنز) اور جوش ٹنگ (11 رنز) کو بولڈ کر کے انگلینڈ کی اننگز کو ختم کیا۔ وکٹ کیپر جیمی اسمتھ 40 رنز بنا کر کرشنا کا تیسرا شکار بنے۔

انگلینڈ کی بیٹنگ لائن میں کئی کھلاڑیوں نے اچھی شروعات کی مگر ہندوستانی گیند بازوں کی مشترکہ کوششوں نے میزبان ٹیم کو بڑی سبقت سے روک دیا۔ اب ہندوستان کے بلے بازوں کے پاس موقع ہے کہ دوسری اننگز میں بہتر مظاہرہ کر کے انگلینڈ پر دباؤ ڈال سکیں۔