بارڈر-گواسکر ٹرافی: ٹیسٹ کا پہلا دن رہا ہندوستان کے نام، آسٹریلیا 177 رن پر آل آؤٹ، ہندوستان کی بہترین شروعات

ہندوستان اور آسٹریلیا کے درمیان آج سے شروع ہوئے بارڈر-گواسکر ٹرافی کے پہلے ٹیسٹ میچ کا پہلا دن ہندوستانی ٹیم کے نام رہا۔ ٹاس جیت کر پہلے بلے بازی کرنے اتری آسٹریلیائی ٹیم کو ہندوستانی گیندبازوں نے محض 177 رنوں پر آل آؤٹ کر دیا۔ جواب میں ہندوستان نے اپنی پہلی اننگ میں 1 وکٹ کے نقصان پر 77 رن بنا لیے ہیں۔ یعنی پہلا دن ختم ہونے کے بعد ہندوستانی ٹیم آسٹریلیا سے 100 رن پیچھے ہے اور اس کے ہاتھ میں 9 کھلاڑی ہیں۔ ہندوستان کی طرف سے میدان پر اترے سلامی بلے باز کے ایل راہل 71 گیندوں میں 20 رن بنا کر آؤٹ ہوئے، جبکہ کپتان روہت شرما 56 رن بنا کر ناٹ آؤٹ ہیں۔

آج جب آسٹریلیائی ٹیم کے کپتان پیٹ کمنس نے ٹاس جیت کر پہلے بلے بازی کرنے کا فیصلہ کیا تو وہ امید کر رہے تھے کہ ایک بڑا اسکور ہندوستان کے سامنے کھڑا کریں گے۔ لیکن ہندوستانی اسٹار آل راؤنڈر رویندر جڈیجہ نے 22 اوور میں 47 رن دے کر 5 وکٹ اپنے نام کیے اور آسٹریلیائی بلے بازی کی کمر توڑ دی۔ آسٹریلیائی ٹیم کو سب سے پہلا جھٹکا محمد سراج نے اس وقت دیا جب اِن فارم بلے باز عثمان خواجہ کو اپنی پہلی ہی گیند پر پویلین بھیج دیا۔ دوسرا وکٹ محمد سمیع نے دلایا جنھوں نے ڈیوڈ وارنر کو کلین بولڈ کیا۔ پھر اس کے بعد اسپن گیندبازوں کا کارنامہ شروع ہوا۔

رویندر جڈیجہ نے مارنس لبوشانے، اسٹیو اسمتھ، میٹ رینشا، پیٹر ہینڈسکامب اور مرفی کو اپنا شکار بنایا، جبکہ آر اشون نے 15.5 اوور میں 42 رن خرچ کر 3 وکٹ اپنے نام کیے۔ محمد اکشر واحد ایسے ہندوستانی گیندباز رہے جنھیں کوئی وکٹ حاصل نہیں ہوا۔ بہرحال، ہندوستان کی بلے بازی آج بہت اچھی رہی، خصوصاً کپتان روہت شرما نے تیز بلے باز کا مظاہرہ کیا اور بے خوف انداز میں کھیلتے دکھائی دیے۔ ہندوستانی شیدائی امید کر رہے ہیں کہ جب جمعہ کو روہت شرما ایک بار پھر بلے بازی کرنے اتریں گے تو اپنے 56 رن کے اسکور کو بڑی وسعت دیں گے۔