’پِنک بال‘ ٹیسٹ میں آسٹریلیا نے ہندوستانی خواتین ٹیم کو 10 وکٹوں سے شکست دے دی

پرتھ کے ویسٹرن آسٹریلیا کرکٹ ایسوسی ایشن گراؤنڈ (ڈبلیو اے سی اے) میں کھیلا گیا ڈے نائٹ ٹیسٹ میچ آسٹریلیا کی خواتین ٹیم نے آسانی سے جیت لیا ہے۔ اس مقابلے میں ہندوستانی خواتین ٹیم پوری طرح فلاپ رہی جس کی وجہ سے ملٹی فارمیٹ سیریز بھی ہار گئی۔ ہندوستانی خواتین ٹیم اس مقابلے میں 3 دن بھی مزاحمت نہیں کر سکی اور تیسرے روز کے پہلے سیشن میں آسٹریلیا نے 10 وکٹوں سے کامیابی حاصل کر لی۔

پِنک بال ٹیسٹ میں ٹاس جیت کر آسٹریلیا نے پہلے گیند بازی کا فیصلہ کیا اور پہلے ہی سیشن سے میچ پر حاوی رہی۔ ہندوستانی ٹیم پہلی اننگ میں 62.4 اوورس میں 198 رنوں پر آل آؤٹ ہو گئی۔ پہلی اننگ میں ہندوستان کی جانب سے جمیما روڈریگز نے نصف سنچری (52 رن) اسکور کی، ان کے علاوہ کوئی بھی بلے  باز آسٹریلائی گیند باز کے سامنے نہیں ٹک پائیں۔ آسٹریلیا کی جانب سے اینابیل سدرلینڈ نے سب سے زیادہ 4 وکٹیں حاصل کیں۔ جواب میں آسٹریلیا نے پہلی اننگ میں 323 رن بنائے، جس کی وجہ سے آسٹریلیا کو 125 رنوں کی مضبوط برتری حاصل ہوئی۔

آل راؤنڈر اینابیل سدرلینڈ نے گیند بازی کے بعد بلے بازی میں بھی کمال کیا اور 129 رنوں کی شاندار اننگ کھیلی۔ ان کے علاوہ ایلس پیری نے بھی 76 رن بنائے اور اس دوران وہ ویمنز ٹیسٹ کرکٹ میں آسٹریلیا کی جانب سے ٹیسٹ میں سب سے زیادہ رن بنانے والی بلے باز بھی بن گئیں۔ دوسری جانب ہندوستان کی سیالی ستگھرے نے ڈیبیو پر 4 وکٹیں حاصل کیں، لیکن وہ آسٹریلوی ٹیم کو بڑا اسکور بنانے سے روک نہیں پائیں۔

ہندوستانی ٹیم دوسری اننگ میں بھی کچھ خاص نہ کر سکی۔ اسمرتی مندھانا اور شفالی ورما ایک بار پھر جلد آؤٹ ہو گئیں۔ سدرلینڈ اور ڈیبیو کرنے والی لوسی ہیملٹن نے مل کر ٹاپ آرڈر کو تہس نہس کر دیا، جس کی وجہ سے ہندوستانی ٹیم اس اننگ میں بھی 200 رن نہیں بنا سکی اور پوری ٹیم 48.2 اوورس میں 149 رن بنا کر آؤٹ ہو گئی۔ ہندوستانی ٹیم یہ اسکور پرتیکا راول کے 63 رنوں کی بدولت بنا سکی اور آسٹریلیا کو 25 رنوں کا معمولی ہدف دیا، جسے آسٹریلیا نے 4.3 اوورس میں بغیر کوئی وکٹ گنوائے حاصل کر لیا۔

واضح رہے کہ ایہ ایک ملٹی فارمیٹ سیریز تھی، جس میں 3 ٹی-20، 3 ونڈے اور ایک ٹیسٹ میچ شامل تھا۔ ہندوستان نے ٹی-20 سیریز 2-1 سے جیت کر برتری حاصل کی تھی، لیکن اس کے بعد آسٹریلیا نے شاندار واپسی کی۔ پہلے ونڈے سیریز میں 3-0 سے جیت حاصل کی اور اس کے بعد واحد ٹیسٹ جیت کر سیریز کو 5-2 سے اپنے نام کر لیا۔